Słužbu źniešniaj raźviedki Ukrainy ŭznačalić Rustem Umieraŭ
Prezident Ukrainy Uładzimir Zialenski paviedamiŭ, što Rustem Umieraŭ budzie pryznačany kiraŭnikom Słužby źniešniaj raźviedki Ukrainy. Da hetaha jon zajmaŭ pasadu sakratara Rady nacyjanalnaj biaśpieki i abarony.
Rustem Umieraŭ. Fota: UNIAN
Pa słovach Zialenskaha, na novaj pasadzie Umieraŭ praciahnie kaardynavać mižnarodnaje supracoŭnictva ŭ vajskovaj śfiery, u tym liku ŭ miežach prahramy Drone Deals. Hety farmat praduhledžvaje doŭhaterminovaje finansavańnie ŭkrainskaj abaronnaj pramysłovaści z boku krain-partnioraŭ, jakija ŭzamien atrymlivajuć dostup da sučasnych abaronnych raspracovak.
Jak adznačyŭ prezident, ciapier pahadnieńni ŭ ramkach Drone Deals užo zaklučanyja ź dzieviaćciu krainami, jašče ź piatnaccaćciu viaducca pieramovy.
Zialenski taksama paviedamiŭ, što Umieraŭ praciahnie zajmacca pieramovami sa Złučanymi Štatami i inšymi partniorami, a taksama budzie ŭdzielničać u pieramoŭnym pracesie, jaki datyčycca spynieńnia rasijska-ŭkrainskaj vajny. Pavodle jaho, pryznačeńnie na čale źniešniaj raźviedki daść Umieravu bolš mahčymaściaŭ dla pracy na styku dypłamatyi, biaśpieki i abarony.
Padčas znachodžańnia na pasadzie sakratara RNBA Umieraŭ užo ŭdzielničaŭ u pieramovach pamiž Ukrainaj, ZŠA i Rasijaj. U lipieni paviedamlałasia, što jon na praciahu dvuch dzion pravodziŭ sustrečy z Džaredam Kušnieram, ziaciem prezidenta ZŠA Donalda Trampa.
Novym sakratarom Rady nacyjanalnaj biaśpieki i abarony stanie Ihar Klimienka. Pavodle Zialenskaha, jahony vopyt pracy na čale Ministerstva ŭnutranych spraŭ i kaardynacyi dziejnaści orhanaŭ biaśpieki dapamoža ŭzmacnić uzajemadziejańnie RNBA z uradam, asabliva ŭ pytańniach ustojlivaści krainy va ŭmovach vajny.