Nie tolki ŭ Litvie. U Polščy pačała skaračacca kolkaść biełarusaŭ ź dziejnymi DNŽ
Polšča źjaŭlajecca samym papularnym kirunkam emihracyi biełarusaŭ, ale chvala pajšła na spad.
Vakzał u Biełastoku. Ilustracyjnaje fota: Naša Niva
Pavodle aficyjnych źviestak na pačatak žniŭnia 2026 hoda, u Polščy naličvajecca 138 253 hramadzianina Biełarusi z dazvołami na žycharstva lubych typaŭ.
Na pačatak 2026‑ha DNŽ u Polščy byŭ u 141 290 hramadzian Biełarusi.
Histaryčny ž maksimum byŭ zafiksavany ŭ vieraśni 2025 hoda, kali ŭ Polščy naličvałasia 145 717 biełarusaŭ ź dziejnymi DNŽ lubych typaŭ.
Hrafik z danymi na 30 vieraśnia 2025 hoda, polski departamient statystyki
Admietna, što na pačatak 2020 hoda ŭ Polščy było ŭsiaho 14 193 hramadzianina Biełarusi z DNŽ usich typaŭ. Mienavita masavyja represii i vajna spravakali chvalu masavaj emihracyi.
Za pieryjad z 2020 pa 2025 hod kolkaść biełarusaŭ z DNŽ u Polščy vyrasła ŭ 10 razoŭ, a kali paraŭnoŭvać z 2015-m, to ŭ 35 razoŭ.
Statystyka pakazvaje, što rekordny pryrost naziraŭsia ŭ 2021—2023 hadach, paśla čaho rost pačaŭ zapavolvacca, a ŭ 2025 hodzie spyniŭsia, i kryvaja pajšła na spad.
Skrynšot: migracje.gov.pl
Zamiest DNŽ biełarusy ŭsio čaściej atrymlivajuć hramadzianstva Polščy
Na pieršy pohlad moža padacca, što ŭ Polščy pačała davoli istotna skaračacca kolkaść biełarusaŭ. Ale heta nie zusim tak. Reč u tym, što mnohija vypadajuć z hetaj statystyki praz toje, što atrymlivajuć polskaje hramadzianstva. Naprykład, tolki za 2025 hod kala 6500 biełarusaŭ atrymali polski pašpart. Ahułam ža za apošnija čatyry hady 20 tysiač hramadzian Biełarusi stali hramadzianami Polščy.
Tym nie mienš možna kanstatavać, što chvala masavaj emihracyi, zapuščanaja ŭ 2020—2022 hadach, spyniłasia.
Adtok biełarusaŭ u inšyja krainy ŭ 2025—2026 hadach pierastaŭ być masavym, choć całkam i nie spyniŭsia. Praŭda, vyjazdžali ŭ inšyja krainy biełarusy i da 2020 hoda.
Pry hetym statystyka ZUS (anałah biełaruskaha FSAN) pakazvaje, što ličba biełarusaŭ, jakija pracujuć u Polščy, raście. Heta moža adbyvacca jak za košt taho, što na rynak pracy vychodziać padrosłyja dzieci mihrantaŭ, tak i praz toje, što ludzi jeduć tudy mienavita na zarobki i pracujuć pa pracoŭnaj vizie.
Ilustracyjnaje fota: Naša Niva
Naprykład, mnohija dalnabojščyki pracujuć mienavita pa vizie, pryčym hadami, bo ŭ Polščy heta papularnaja źjava, kali ŭ čałavieka niama namieru zastavacca ŭ Polščy.
Pa stanie na kaniec maja 2026 hoda ŭ sistemie naličvajecca 143030 hramadzian Biełarusi. U paraŭnańni z krasavikom ich kolkaść vyrasła na 1201 čałavieka, a ŭ paraŭnańni z kancom maja 2025 hoda — na 6418 čałaviek.