U Biełharadzie paśla ataki dronaŭ haryć univiersitet, dzie raspracoŭvali bieśpiłotniki
«Tam usio haryć — prosta ŭsio».
Unačy bieśpiłotniki atakavali rasijski Biełharad, paśla čaho ŭ Biełharadskim dziaržaŭnym technałahičnym univiersitecie (BDTU) uspychnuŭ maštabny pažar. Pra heta paviedamlaje Telegram-kanał «Piepieł Biełharad», apublikavaŭšy videa.
«Tam usio haryć — prosta ŭsio», — kamientuje videa miascovaja žycharka.
Pavodle infarmacyi vydańnia, va ŭniviersitecie raspracoŭvali i vypraboŭvali bieśpiłotnyja latalnyja aparaty (BPŁA). Mienavita pa hetym korpusie byŭ naniesieny ŭdar bieśpiłotnikami, i budynak całkam zhareŭ.
Jak paviedamlaje Astra, u BDTU prajektavali aŭtamatyzavanuju sistemu kiravańnia BPŁA na bazie mikrapracesara «Miłandr». Pry hetym va ŭniviersitecie zajaŭlali, što raspracoŭka maje hramadzianskaje pryznačeńnie i vykarystoŭvajecca dla manitorynhu linij elektrapieradačy, ciepłatras i aerafotazdymki.
Akramia taho, letam 2026 hoda ŭniviersitet abviaściŭ nabor školnikaŭ na kurs pa raspracoŭcy bieśpiłotnikaŭ.