Čynoŭniki pierabłytali numar kvatery i zasialili žančynu nie tudy, a kali jana zrabiła ramont, zapatrabavali pamianiacca z susiedam
Niepryjemnaja historyja adbyłasia ŭ Dziatłavie.
Dom u Dziatłavie. Fota hieraini
Volha Hramadskaja vyrasła ŭ dziciačym domie i šmat hadoŭ stajała ŭ čarzie na palapšeńnie žyllovych umoŭ. U 2025 hodzie joj jak siracie vydali novuju trochpakajovuju arendnuju kvateru №4 u novym domie ŭ Dziatłavie (Hrodzienskaja vobłaść). Žančyna z dvuma dziećmi (13 i 9 hadoŭ) zasialiłasia, zrabiła ramont i abstalavała žyllo pad siabie — vydatkavała bolš za 10 tysiač rubloŭ.
Praz hod z ŽKH patelefanavali i paviedamili: zabudoŭščyk pry zdačy doma pierabłytaŭ numaracyju kvater, i nasamreč Volha pavinna žyć nie ŭ kvatery №4, a ŭ №6 (kvatery pa płoščy padobnyja). Žančynie prapanavali prosta pierajechać, biez kampiensacyi, apisvaje sb.by.
Volha sprabavała damovicca — prapanoŭvała prosta vypravić dakumienty, kali roźnica minimalnaja. Ale joj admovili, prapanavaŭšy ŭzamien tolki hruzčykaŭ dla pierajezdu. Tady jana źviarnułasia ŭ prakuraturu, zapisała rolik u TikTok i pajšła ŭ ŚMI.
U ŽKH paćvierdzili: pamyłku dapuściŭ zabudoŭščyk (UKB Słonimskaha rajona), a pry pryjomcy jaje nie zaŭvažyŭ i majstar žyłfondu. Prablemu vyjavili tolki praz hod, kali susiedzi zanialisia afarmleńniem techpašparta. Pryčyna, čamu prosta nielha pamianiać dakumienty: kvatera №6 budavałasia na biudžetnyja srodki, a kvatera Volhi — arendnaja, tamu aficyjna heta roznyja katehoryi žylla.
Paśla vizitu žurnalistaŭ u ŽKH zajavili, što ŭsio ž pastarajucca ŭrehulavać situacyju na ŭzroŭni dakumientaŭ, nie prymušajučy siamju pierajazdžać.