Kamandujučy Pavietranymi siłami Rasii Čajko žyvy. Z troch zahinułych pry vybuchu ŭ elitnym restaranie ŭ Maskvie tolki adzin — naviedvalnik

Dvoje inšych — heta achoŭnik i žančyna, jakaja sprabavała pranieści samarobnaje vybuchovaje prystasavańnie, paviedamiŭ Nacyjanalny antyterarystyčny kamitet Rasii. 21 čałaviek paranieny, 17 ź ich u ciažkim stanie. Abjektam zamachu byŭ kamandujučy Pavietrana-kaśmičnymi siłami Rasii Alaksandr Čajko.

Na miescy zdareńnia. Fota: TASS

Uviečary kala 19:50 kala ŭvachodu ŭ restaran Balzi Rossi ŭ centry Maskvy adbyŭsia mocny vybuch, jaki, pavodle paviedamleńniaŭ, byŭ čutny za niekalki kiłamietraŭ. Paśla zdareńnia terytoryju vakoł restarana ačapili ŭzbrojenyja supracoŭniki siłavych struktur.

Pavodle papiaredniaj infarmacyi, žančyna z vybuchovaj pryładaj pasprabavała trapić u restaran, dzie ŭ toj momant prachodziła śviatočnaje mierapryjemstva. Achoŭnik nie dazvoliŭ joj uvajści, paśla čaho adbyŭsia vybuch.

U vyniku zdareńnia zahinuli try čałavieki: sama žančyna, supracoŭnik achovy i adzin z naviedvalnikaŭ restarana. Vykanaŭcu terakta litaralna razarvała na kavałki, paśla ŭ siecivie źjaviłasia fota adarvanaj ruki. 

Pavodle apošnich źviestak, traŭmy atrymali 21 čałaviek. U paciarpiełych dyjahnastavanyja adkrytyja i zakrytyja čerapna-mazhavyja traŭmy, ranieńni hrudnoj kletki i žyvata, paškodžańni kaniečnaściaŭ, apioki i inšyja vybuchovyja traŭmy.

Vidavočcy paviedamili, što paśla vybuchu ludziej evakujavali z budynka, pry hetym niekatorych vyvodzili nie praz zapasnyja vychady. Miascovyja žychary taksama raskazvali, što bačyli ludziej z kryvavymi ranami.

U suviazi sa zdareńniem byŭ admienieny Druhi načny viełafiestyval, jaki pavinien byŭ adbycca ŭviečary na Sadovym kalcy. Arhanizatary paviedamili, što mierapryjemstva pieraniasuć na inšuju datu.

Raniej paviedamlałasia, što ŭ hety viečar u Balzi Rossi sabraŭ haściej na bankiet niechta z vysokapastaŭlenych siłavikoŭ, i navat vykazvalisia viersii, chto b heta moh być. Pakul niama aficyjnaha paćviardžeńnia hetaj infarmacyi. Adnak telehram-kanały pišuć, što svoj 55‑hadovy jubilej tam śviatkavaŭ kamandujučy Pavietrana-kaśmičnymi siłami Rasii Alaksandr Čajko. Ukrainskija pravaachoŭnyja orhany abvinavačvajuć čaści, padnačalenyja Čajko, u vajennych złačynstvach, ździejśnienych pačynajučy ad 2022 hoda. U tym liku i ŭ Bučy Kijeŭskaj vobłaści. Da lipienia 2022 hoda, pierad tym jak uznačalić rasijskuju avijacyju, Čajko kamandavaŭ vojskami Uschodniaj vajskovaj akruhi — akurat tymi, jaki nastupali na Kijeŭ ź Biełarusi.

Kamientary da artykuła