U pakistanskich harach zahinuła suśvietnaja lehienda alpinizmu. Jak heta adbyłosia

Siarod zahinułych u vyniku sychodu łaviny na hary Broŭd-Pik u Pakistanie byŭ viadomy alpinist i były vajskoviec brytanskaha vojska Nirmał Purdža, paviedamiła jaho kampanija. Čym byŭ viadomy hety čałaviek, piša Bi-bi-si.

Nirmał Purdža staŭ viadomym na mižnarodnym uzroŭni paśla vychadu dakumientalnaha filma Netflix u 2021 hodzie

Elite Expeditions u dopisie ŭ sacsietkach zajaviła, što z «hłybokim sumam i vializnym bolem» paćviardžaje hibiel Purdžy ŭ vyniku łaviny, jakaja zdaryłasia ŭ čaćvier. Kampanija taksama paviedamiła, što atrymała paćviardžeńnie: inšyja dzieviać udzielnikaŭ ekśpiedycyi taksama nie vyžyli.

Hibiel Purdžy taksama paćvierdziŭ premjer-ministr Niepała Balendra Šach. U sacsietkach jon napisaŭ, što

«trahičnaja hibiel šaściarych niepalskich i čatyroch inšych zamiežnych alpinistaŭ, siarod jakich byŭ rekardsmien śvietu Nirmał Purdža, u hornym masivie Karakarum u Pakistanie, šakavała nas».

«Historyja ich mužnaści, addanaści i ŭniosku nazaŭždy zastaniecca krynicaj natchnieńnia», — dadaŭ premjer.

43‑hadovy alpinist, jaki naradziŭsia ŭ Niepale, staŭ viadomym paśla taho, jak u 2019 hodzie skaryŭ usie 14 najvyšejšych viaršyń śvietu trochi bolš čym za šeść miesiacaŭ. Asabliva prasłaviŭ jaho vychad u 2021 hodzie dakumientalnaha filma Netflix «14 viaršyń: Niama ničoha niemahčymaha» (14 Peaks: Nothing Is Impossible), jaki raskazvaje pra ŭzychodžańni Nirmała Purdžy.

Raniej pakistanskija słužboŭcy paviedamlali, što znajšli cieły troch alpinistaŭ ź dziesiaci ŭdzielnikaŭ ekśpiedycyi — amierykanki Miełary Hajs, Nadchiry Achmied Abduły Al-Charci z Amana i Pur Bachadura Hurunha ź Niepała.

Łavina syšła ŭ čaćvier na viaršyni vyšynioj 8047 mietraŭ u hornym masivie Karakarum. Mižnarodnuju hrupu alpinistaŭ uznačalvaŭ Purdža, jaki ŭ 2003 hodzie pastupiŭ u brytanskaje vojska, a ŭ 2009 hodzie — u Śpiecyjalnuju łodačnuju słužbu (Special Boat Service) — padraździaleńnie śpiecyjalnaha pryznačeńnia Karaleŭskaha fłotu Vialikabrytanii.

Nirmał Purdža razam sa svaimi tavaryšami z kamandy stali pieršymi, chto ŭzyšoŭ na pakistanskuju haru K2 uzimku 2021 hoda. Fota: Getty Image

Broŭd-Pik ličać adnoj z najskładaniejšych hor dla alpinistaŭ. Pieršaje paśpiachovaje ŭzychodžańnie na viaršyniu adbyłosia ŭ 1957 hodzie, kali pika dasiahnuła aŭstryjskaja ekśpiedycyja. Z taho času na haru ŭzychodzili šmat inšych alpinistaŭ, ale dziasiatki ludziej i zahinuli padčas sprob.

Adnym z najbolš śmiarotnych hadoŭ na Broŭd-Piku da hetaha byŭ 2013-y, kali tut zahinuli jak minimum šeść čałaviek.

Kamientary da artykuła