U Hrecyi lasnyja pažary achapili vakolicy Afinaŭ

Novaja chvala lasnych pažaraŭ raspaŭsiudziłasia ŭ roznych rajonach macierykovaj Hrecyi. Situacyja ŭskładniajecca mocnym vietram, jaki spryjaje chutkamu raspaŭsiudžvańniu ahniu. U krainie pravodziacca maštabnyja apieracyi tušeńnia pažaraŭ i evakuacyi žycharoŭ, paviedamlaje Reuters.

Fota: AP Photo/Michael Varaklas

Jak paviedamlajecca, paśla adnosna spakojnaha pačatku pažaraniebiaśpiečnaha siezona ŭ Hrecyi znoŭ uźnikła niekalki bujnych asiarodkaŭ uzharańnia. Asabliva składanaja situacyja skłałasia ŭ vobłaści Bieotyja, dzie ahoń nabliziŭsia da prybiarežnych nasielenych punktaŭ.

Da baraćby z pažarami pryciahnutyja bolš za 300 pažarnikaŭ, kala 90 pažarnych mašyn i avijacyja. Ź plažu Ahias-Vasilijas pa mory byli evakujavanyja bolš za 200 čałaviek, jašče 12 čałaviek vyvieźli ź plažu Porta-Hiermiena. U apošnim nasielenym punkcie, jaki znachodzicca niepadalok ad Afinaŭ, ahniom, pavodle miascovych uładaŭ, źniščana kala sta damoŭ.

Hreckija ŭłady abviaścili nadzvyčajny ŭzrovień pažarnaj niebiaśpieki ŭ rehijonach Atyka i Eŭbieja.

Adnačasova z pažarami ŭ Hrecyi składanaja situacyja zachoŭvajecca ŭ Francyi dy Ispanii.

Na paŭdniovym zachadzie Francyi, u departamiencie Žyronda, bujny pažar, jaki pačaŭsia 22 lipienia kala Bardo i źniščyŭ kala 42 tysiač hiektaraŭ lesu, udałosia łakalizavać. Adnak u departamiencie Var na poŭdni krainy ahoń znoŭ uzmacniŭsia: za niekalki hadzin połymia achapiła bolš za tysiaču hiektaraŭ. U vyniku za noč byli evakujavanyja amal 2500 čałaviek.

U Ispanii praciahvajecca baraćba ź niekalkimi bujnymi asiarodkami. Novy pažar uźnik u paŭnočnaj pravincyi Leon. U susiedniaj Samory ŭdałosia ŭziać pad kantrol uzharańnie, jakoje źniščyła kala 11 tysiač hiektaraŭ. Pažar u pravincyi Kasteljon, dzie vyharała amal 10 tysiač hiektaraŭ, taksama byŭ łakalizavany paśla siami dzion baraćby.

Palicyja Ispanii dapuskaje, što niekatoryja pažary mahli być vyklikanyja naŭmysnymi padpałami. U Kasteljonie byli znojdzienyja dva asobnyja asiarodki ŭzharańnia.

Bujnyja pažary ŭ centralnych rehijonach Ispanii — Madrydzie i Avile — udałosia stabilizavać. 

Kamientary da artykuła