U Vienhryi i Rumynii z-za śpioki i abmialeńnia Dunaja spynili atamnyja reaktary
Upieršyniu ŭ historyi Vienhryi i Rumynii daviałosia adklučyć atamnyja enierhabłoki z-za anamalna nizkaha ŭzroŭniu vady ŭ Dunai.
AES u Rumynii. Fota: Andreea Alexandru / AP
Adzinaja AES Vienhryi ŭ Pakšy časova spyniła vytvorčaść elektraenierhii: u vyniku kraina straciła kala 2000 miehavat mahutnaści. Premjer-ministr Vienhryi Pieter Madźjar papiaredziŭ, što ŭžo ŭ najbližejšyja dni moža ŭźniknuć enierhietyčny kryzis, piša Bild.
Spynieńnie asabliva adčuvalnaje dla Vienhryi, dzie kala pałovy ŭsioj elektraenierhii vypracoŭvajecca na AES. Na fonie mocnaj śpioki spažyvańnie elektraenierhii raście praz aktyŭnaje vykarystańnie kandycyjanieraŭ, a ŭłady zaklikali žycharoŭ ekanomić elektryčnaść u hadziny pikavaj nahruzki. Pryčynaj prablemy staŭ uzrovień Dunaja: z-za niedachopu apadkaŭ i niekalkich chvalaŭ śpioki vada ŭ race apuściłasia da rekordna nizkich značeńniaŭ.
Padobnaja situacyja adbyłasia i ŭ Rumynii. Tam praz paharšeńnie hidrałahičnych umoŭ spynili druhi reaktar AES «Čarnavode» — adzinaj atamnaj elektrastancyi krainy. Pieršy reaktar byŭ adklučany niekalki dzion tamu.
AES vykarystoŭvajuć vadu z rek dla astudžeńnia abstalavańnia, tamu značnaje abmialeńnie Dunaja prymušaje źnižać mahutnaść abo całkam spyniać ich rabotu.