Pałac kultury i navuki ŭ Varšavie 9 žniŭnia padśvieciać bieł-čyrvona-biełymi kolerami

9 žniŭnia, u šostuju hadavinu pačatku masavych pratestaŭ paśla sfalsifikavanych prezidenckich vybaraŭ 2020 hoda ŭ Biełarusi fasad Pałaca kultury i navuki ŭ Varšavie budzie padśviečany bieł-čyrvona-biełymi kolerami, paviedamiła pres-słužba Abjadnanaha pierachodnaha kabinieta Biełarusi.

Zdymak ilustracyjny. Fota: «Biełsat»

Takoje rašeńnie pryniaŭ prezident Varšavy Rafał Tšaskoŭski ŭ adkaz na zvarot namieśnika kiraŭnicy Abjadnanaha pierachodnaha kabinieta i kiraŭnika Narodnaha antykryzisnaha ŭpraŭleńnia Paŭła Łatuški.

Pavodle paviedamleńnia meryi, padśvietka budzie pracavać 9 žniŭnia z 18:00 da 24:00.

Pavieł Łatuška padziakavaŭ haradskim uładam za hety simvaličny žest, adznačyŭšy, što jon śviedčyć pra niaźmiennuju padtrymku biełaruskaha naroda z boku Varšavy i Polščy.

Jon taksama vykazaŭ udziačnaść Polščy za dapamohu, jakaja akazvajecca biełarusam na praciahu apošnich šaści hadoŭ, i vykazaŭ nadzieju, što kraina i nadalej budzie zastavacca nadziejnym partnioram u padtrymcy demakratyčnych pieramien u Biełarusi.

U hety ž dzień u centry Varšavy adbudziecca tradycyjny mitynh, pryśviečany šostaj hadavinie padziej 2020 hoda. Jon pačniecca a 18:00 kala pomnika Mikałaju Kapierniku.

Arhanizatary zaprašajuć biełarusaŭ i siabroŭ Biełarusi dałučycca da mierapryjemstva ŭ znak salidarnaści ź idejami svabody, praŭdy i demakratyi.

Kamientary da artykuła