U Homieli rabočaha dapuścili da pracy z 3,6 pramile ałkaholu. Heta skončyłasia trahiedyjaj

U Homieli padčas pasiadžeńnia rajonnaj kamisii pa prafiłaktycy pjanstva, ałkahalizmu, narkamanii i ŭžyvańnia psichaaktyŭnych rečyvaŭ abmierkavali vypadki, kali rabotniki źjaŭlalisia na pradpryjemstvach u stanie apjanieńnia. Niahledziačy na prafiłaktyčnuju pracu i kantrol, takija situacyi praciahvajuć adbyvacca, piša vydańnie «Biełka».

Zdymak ilustracyjny. Fota: «Biełka»

Asablivuju ŭvahu ŭdzielniki pasiadžeńnia nadali śmiarotnamu niaščasnamu vypadku na adnym z pradpryjemstvaŭ. Tam padčas pahruzki lesamateryjałaŭ u čyhunačny vahon rabočy atrymaŭ śmiarotnuju traŭmu ad elemienta hazavaha krana.

Rasśledavańnie jašče praciahvajecca, ale ŭžo ŭstanoŭlena, što mužčyna naohuł nie pavinien byŭ znachodzicca ŭ hety dzień na pracy. Adnak ža majstar, imknučysia vykanać vytvorčy płan, vyklikaŭ jaho ŭ jakaści dapamohi i dapuściŭ da pracy, choć toj znachodziŭsia ŭ stanie mocnaha ałkaholnaha apjanieńnia.

Ekśpiertyza pakazała, što ŭ kryvi zahinułaha było 3,6 pramile ałkaholu. Takaja kancentracyja ličycca vielmi niebiaśpiečnaj i moža pryvieści da ciažkaha atručvańnia. Pavodle śviedčańnia śpiecyjalistaŭ, jana adpaviadaje vypitym prykładna paŭtara litra harełki.

Majstra, jaki dapuściŭ parušeńnie, zvolnili, a jašče niekalki supracoŭnikaŭ atrymali dyscyplinarnyja spahnańni. Kab nie dapuścić padobnych trahiedyj u budučyni, na pradpryjemstvie pačali vypraboŭvać sistemu instrumientalnaha kantrolu stanu rabotnikaŭ ź videafiksacyjaj.

Na inšym, užo pryvatnym pradpryjemstvie, vyjavili prablemu inšaha charaktaru. U kanstruktara, jakoha pryniali na pracu, paźniej była vyjaŭlena mocnaja zaležnaść ad preparata bakłafien. Choć hety lekavy srodak nie ŭvachodzić u śpis narkatyčnych rečyvaŭ, jaho złoŭžyvańnie moža surjozna ŭpłyvać na pavodziny čałavieka.

Pavodle kiraŭnictva pradpryjemstva, rabotnik to znachodziŭsia ŭ stanie ejfaryi, to stanaviŭsia całkam abyjakavym da taho, što adbyvajecca, i nie moh narmalna vykonvać svaje abaviazki. U vyniku pracoŭny kantrakt ź im byŭ skasavany.

Jašče adzin vypadak adbyŭsia na trecim pradpryjemstvie, dzie vartaŭnik źjaviŭsia na pracoŭnym miescy z prykmietami ałkaholnaha apjanieńnia. Adnak aficyjna paćvierdzić hety fakt nie ŭdałosia, bo mužčyna, kali jaho sprabavali zatrymać, uciok.

Kamientary da artykuła