«Ja baču, jak moj tvar pačynaje dryžać». U biełaruski ŭ Polščy dyjahnastavali puchlinu hałaŭnoha mozhu
Na pačatku lipienia ŭ Inhi raptoŭna pačaŭ dryžać tvar. Žančyna zapadozryła insult. Adnak abśledavańnie pryviało da inšaha dyjahnazu — puchlina hałaŭnoha mozhu.
Daktary pryznačyli apieracyju. Za dzień da jaje Inha raskazała Most, jak jaje žyćcio raptoŭna źmianiłasia i jakoje lačeńnie čakaje jaje ŭ najbližejšy čas.
Inha žyvie ŭ Polščy ŭžo amal šeść hadoŭ — paśla vybaraŭ 2020 hoda jana źjechała tudy razam z synam. Žančyna pracuje śpiecyjalistam pa lehalizacyi i ahientam pa nieruchomaści. Zaraz jana vychoŭvaje dvaich dziaciej — čatyrnaccacihadovaha syna i piacimiesiačnuju dačku.
Uviečary 8 lipienia Inha viarnułasia dadomu ź dziciem paśla vakcynacyi i adčuła siabie drenna — u jaje pačaŭ dryžać tvar. Siamja vyklikała chutkuju dapamohu, ale da pryjezdu miedykaŭ stan stabilizavaŭsia.
— Spačatku ja dumała, što heta insult, bo nie mahła ŭśmichnucca, — uspaminaje Inha.
Insult daktary vyklučyli. Adnak užo na nastupny dzień simptomy viarnulisia.
— Ja prosta baču, jak moj tvar pačynaje dryžać, — raskazvaje jana.
Syn žančyny paćvierdziŭ, što taksama heta zaŭvažyŭ. Inha znoŭ vyklikała chutkuju dapamohu. Pavodle jaje słoŭ, miedyki pryjechali litaralna praź niekalki chvilin: «adrazu pačuła, jak zahučali sireny».
«Znajšli puchlinu hałaŭnoha mozha»
Daktary paviedamili Inzie, što joj nieabchodna terminova jechać u balnicu na abśledavańnie. U miedycynskich dakumientach paznačana, što ŭ žančyny naziralisia parušeńnie maŭleńnia, apuskańnie levaha vuhałka rota, asłableńnie myšačnaj siły levaj ruki, a taksama skryŭleńnie myšcaŭ tvaru ź levaha boku.
Inhu dastavili ŭ adździaleńnie nieadkładnaj dapamohi, pastavili katetar, zrabili nieabchodnyja analizy, uviali niesteroidnyja preparaty dla kupiravańnia prystupu i praviali MRT hałaŭnoha mozha.
— Pa vynikach tamahrafii vyśvietliłasia, što ŭ mianie puchlina hałaŭnoha mozha. Jakaja jana — daktary pakul nie viedajuć, — kaža Inha.
U Ispanii za dva tydni vyrasła radzimka i pačała kryvavić
Daktary paličyli puchlinu apierabielnaj — jana raźmieščana bližej da kostki. Paśla vydaleńnia ŭzor tkaniny nakirujuć na histałahičnaje daśledavańnie. Mahčyma, paśla hetaha spatrebicca chimijaterapija abo imunaterapija, raskazvaje Inha.
Sprava ŭ tym, što letaś padčas adpačynku ŭ Ispanii jana zaŭvažyła, što ŭ jaje za dva tydni raptoŭna vyrasła vialikaja radzimka, jakaja kryvaviła i hnaiłasia. Jaje vydalili ŭ Barsiełonie.
Dadatkova žančynie zrabili MRT i ultrahukavoje daśledavańnie limfatyčnych vuzłoŭ. Ispanskija daktary nastojvali, kab jana zastałasia i prajšła poŭnaje abśledavańnie. Tady ŭsie vyniki byli «čystymi» — Inzie dazvolili viarnucca ŭ Polšču, ale paraili stać na ŭlik u ankołaha i zavieści kartu radzimak.
Ciapier daktary nie vyklučajuć, što puchlina moža być mietastazam raniej vydalenaj miełanomy.
— Prafiesar kaža, što, mahčyma, radzimka i puchlina mozha niejak źviazanyja pamiž saboj. Ale biez histałohii dakładna ničoha skazać nielha, — adznačaje Inha.
Akramia MRT hałaŭnoha mozha, žančynie praviali abśledavańnie ŭsiaho arhanizma. Padazronych złajakasnych utvareńniaŭ nie vyjavili. Lekary źviarnuli ŭvahu na padstraŭnikavuju załozu, ale ankamarkiery akazalisia ŭ miežach normy.
«Prosta jak žyć?»
Ciapier siamja apynułasia ŭ składanaj finansavaj situacyi. Apieracyja budzie praviedzienaja pa miedycynskaj strachoŭcy, ale reabilitacyja, kansultacyi ŭ prafiesaraŭ, jakija choča prajści žančyna, i dadatkovyja abśledavańni mohuć paciahnuć značnyja vydatki. Častku pracedur možna atrymać biaspłatna tolki paśla praciahłaha čakańnia ŭ čarzie pa strachoŭcy NFZ.
Kali biełaruska zmoža viarnucca da pracy, pakul nieviadoma — usio budzie zaležać ad vynikaŭ apieracyi. Muž taksama nie moža vyjści na pracu, bo dahladaje piacimiesiačnaje dzicia.
— Prosta jak žyć? Nie viedaju, što budzie dalej — jakoj budzie reabilitacyja i jak uvohule vyžyć, — kaža Inha.