KDK atrymaje prava prypyniać pracu kram za zavyšeńnie cen i zabaraniać likvidacyju biznesu

Na Nacyjanalnym pravavym partale apublikavali zakon, jaki ŭnosić źmianieńni ŭ dziejnaść Kamiteta dziaržaŭnaha kantrolu (KDK) i istotna pašyraje jaho paŭnamoctvy.

Fota: BiełTA

Dakumient unosić papraŭki ŭ zakony «Ab Kamitecie dziaržaŭnaha kantrolu Respubliki Biełaruś i jaho terytaryjalnych orhanach», «Ab orhanach finansavych rasśledavańniaŭ Kamiteta dziaržaŭnaha kantrolu Respubliki Biełaruś» i «Ab baraćbie z teraryzmam».

Adnoj z hałoŭnych navacyj stała nadadzienaje KDK prava prypyniać dziejnaść subjektaŭ haspadarańnia ŭ vypadku parušeńniaŭ zakanadaŭstva ab cenaŭtvareńni, a taksama pravił handlu i hramadskaha charčavańnia. Takija miery mohuć prymianiacca da kram i inšych handlovych abjektaŭ.

Akramia taho, Kamitet dziaržaŭnaha kantrolu atrymaje mahčymaść zabaraniać dziaržaŭnuju rehistracyju i likvidacyju jurydyčnych asob.

Jašče adno novaje paŭnamoctva — prava prypyniać apieracyi z elektronnymi kašalkami ŭ bankach i niabankaŭskich kredytna-finansavych arhanizacyjach.

Zakon taksama pašyraje paŭnamoctvy orhanaŭ finansavych rasśledavańniaŭ KDK. Ich aficyjna adnieśli da orhanaŭ, jakija niepasredna ažyćciaŭlajuć baraćbu z teraryzmam.

Častka novych normaŭ nabuduć moc praz šeść miesiacaŭ paśla aficyjnaha apublikavańnia zakona, a asobnyja pałažeńni pačnuć dziejničać z 1 lipienia 2027 hoda.

Kamientary da artykuła