Adziny naftapierapracoŭčy zavod Hruzii trapiŭ pad sankcyi Jeŭrasajuza

Adziny ŭ Hruzii naftapierapracoŭčy zavod, raźmieščany ŭ čarnamorskim porcie Kulevi, uklučany ŭ 21‑šy pakiet sankcyj Jeŭrapiejskaha sajuza. Abmiežavańni źviazanyja z tym, što pradpryjemstva pierapracoŭvaje rasijskuju naftu, piša Deutsche Welle.

NPZ u Kulevi. Fota: portnews.ru

Pavodle rašeńnia Rady ES, zabarona na ździełki z zavodam ustupić u siłu 25 studzienia 2027 hoda. Adnak hetaha možna paźbiehnuć, kali da taho času pradpryjemstva całkam admovicca ad pierapracoŭki rasijskaj syraviny.

Jašče 1 lipienia kampanija Black Sea Petroleum (BSP), jakaja vałodaje zavodam, paviedamiła, što ŭ žniŭni—vieraśni spynić vykarystańnie rasijskaj nafty. Pavodle hruzinskich ŚMI, ciapier kala 99 % impartu nafty ŭ Hruziju prypadaje mienavita na Rasiju.

Ministerstva zamiežnych spraŭ Hruzii 24 lipienia vykazała škadavańnie z nahody rašeńnia Jeŭrasajuza. U viedamstvie zajavili, što padčas padrychtoŭki 21‑ha pakieta sankcyj hruzinski bok pieradaŭ jeŭrapiejskim instytutam usiu nieabchodnuju infarmacyju i dakumienty, jakija, na jaho dumku, śviedčać pra adsutnaść padstaŭ dla ŭviadzieńnia abmiežavańniaŭ suprać zavoda.

U MZS taksama vykazali nadzieju, što na praciahu nastupnych šaści miesiacaŭ Jeŭrasajuz pierahledzić svajo rašeńnie. Hruzija, jak adznačyli ŭ viedamstvie, hatovaja i nadalej supracoŭničać ź ES i davać usiu nieabchodnuju infarmacyju.

Pra mahčymaść uviadzieńnia sankcyj suprać naftapierapracoŭčaha zavoda ŭ Kulevi paviedamlałasia jašče ŭ lutym 2026 hoda. Pavodle rasśledavańnia rasijskaha vydańnia The Insider, ułaśniki pradpryjemstva majuć suviazi z Rasijaj. Zavod pačaŭ pracu ŭ kastryčniku 2025 hoda, kali tudy pastupiła pieršaja partyja rasijskaj nafty.

Jeŭrapiejski sajuz padazravaŭ, što pradpryjemstva mahło vykarystoŭvacca dla reekspartu rasijskaj nafty i sadziejničańnia abychodu sankcyj. U adkaz ułady Hruzii i kiraŭnictva BSP śćviardžali, što nibyta nie parušajuć sankcyjny režym.

U sakaviku Jeŭrapiejskaja kamisija paviedamiła, što Hruzija ŭziała na siabie abaviazacielstva nie dapuskać u svaje party sudny rasijskaha tak zvanaha «cieniavoha fłotu». Tady ž u BSP zajavili pra namier pastupova zamianić rasijskuju naftu syravinaj z Turkmienistana, Kazachstana i inšych alternatyŭnych krynic.

Kamientary da artykuła