Dva ministry, novyja pasły i inšyja čynoŭniki — kadravy dzień u Łukašenki
Siońnia prajšoŭ kadravy dzień, adbylisia nastupnyja pryznačeńni
Vadzim Alšeŭski staŭ ministram architektury i budaŭnictva. Raniej jon byŭ vice-hubiernataram Brestčyny, kuryrujučy pytańni budaŭnictva, transpartu i žyllova-kamunalnaj haspadarki.
Vadzim Alšeŭski naradziŭsia ŭ 1975 hodzie ŭ Vysokim Kamianieckaha rajona. Skončyŭ Brescki palitechničny instytut. Z 2000 pa 2006 hod zajmaŭ roznyja pasady ŭ Bresckim abłvykankamie, zatym pracavaŭ pieršym namieśnikam načalnika inśpiekcyi Dziaržbudnahladu pa Bresckaj vobłaści, a paśla — kiraŭnikom inśpiekcyi Departamienta kantrolu i nahladu za budaŭnictvam pa Bresckaj vobłaści.
Z 2018 hoda — namieśnik staršyni Bresckaha abłvykankama. Kuryravaŭ pytańni budaŭnictva, žyllova-kamunalnaj haspadarki, enierhietyki, transpartu i suviazi.
Siarhiej Uldzinovič pryznačany ministram lasnoj haspadarki
Jon naradziŭsia ŭ 1980 hodzie. Z 2008 pa 2023 hod uznačalvaŭ Kapylski lashas, a potym try hady kiravaŭ Minskim lashasam.
Pasłom u Tadžykistanie pryznačany Alaksandr Chudalejeŭ. Da hetaha času jon zajmaŭ pasadu pieršaha namieśnika ministra pa nadzvyčajnych situacyjach.
Juryj Mikałajčyk pryznačany pasłom u Mazambiku pa sumiaščalnictvie. Jon taksama ŭznačalvaje biełaruskuju dypłamatyčnuju misiju ŭ Zimbabve.
Siarhiej Miadźvieckas uzhodnieny na pasadu pieršaha namieśnika staršyni Hrodzienskaha abłvykankama. Da hetaha času jon pracavaŭ staršynioj Astravieckaha rajvykankama.
Pasadu namieśnika staršyni Bresckaha abłvykankama, jaki kuryruje pytańni budaŭnictva, transpartu i žyllova-kamunalnaj haspadarki, zojmie Alaksandr Maksimčuk. Raniej jon byŭ hienieralnym dyrektaram Bresckaha ŽKH.
Astraviecki rajon uznačalić Rusłan Žukoŭski. Da hetaha času jon zajmaŭ pasadu pieršaha namieśnika staršyni — načalnika ŭpraŭleńnia sielskaj haspadarki i charčavańnia Smarhonskaha rajvykankama.
Vital Šulejka ŭzhodnieny na pasadu staršyni Słonimskaha rajvykankama. Raniej jon byŭ pieršym namieśnikam staršyni — načalnikam upraŭleńnia sielskaj haspadarki i charčavańnia Dziatłaŭskaha rajvykankama.
Na pasadu staršyni Ščučynskaha rajvykankama ŭzhodnieny Ihar Avierka. Dla jaho heta pavyšeńnie z pasady pieršaha namieśnika staršyni — načalnika ŭpraŭleńnia sielskaj haspadarki i charčavańnia hetaha ž rajvykankama.
Uładzisłaŭ Hieršhoryn uznačalić administracyju Leninskaha rajona horada Hrodna. Raniej, z 2019 pa 2026 hod, jon kiravaŭ Ašmianskim rajonam.