Два міністры, новыя паслы і іншыя чыноўнікі — кадравы дзень у Лукашэнкі
Сёння прайшоў кадравы дзень, адбыліся наступныя прызначэнні
Вадзім Альшэўскі стаў міністрам архітэктуры і будаўніцтва. Раней ён быў віцэ-губернатарам Брэстчыны, курыруючы пытанні будаўніцтва, транспарту і жыллёва-камунальнай гаспадаркі.
Вадзім Альшэўскі нарадзіўся ў 1975 годзе ў Высокім Камянецкага раёна. Скончыў Брэсцкі палітэхнічны інстытут. З 2000 па 2006 год займаў розныя пасады ў Брэсцкім аблвыканкаме, затым працаваў першым намеснікам начальніка інспекцыі Дзяржбуднагляду па Брэсцкай вобласці, а пасля — кіраўніком інспекцыі Дэпартамента кантролю і нагляду за будаўніцтвам па Брэсцкай вобласці.
З 2018 года — намеснік старшыні Брэсцкага аблвыканкама. Курыраваў пытанні будаўніцтва, жыллёва-камунальнай гаспадаркі, энергетыкі, транспарту і сувязі.
Сяргей Ульдзіновіч прызначаны міністрам лясной гаспадаркі
Ён нарадзіўся ў 1980 годзе. З 2008 па 2023 год узначальваў Капыльскі лясгас, а потым тры гады кіраваў Мінскім лясгасам.
Паслом у Таджыкістане прызначаны Аляксандр Худалееў. Да гэтага часу ён займаў пасаду першага намесніка міністра па надзвычайных сітуацыях.
Юрый Мікалайчык прызначаны паслом у Мазамбіку па сумяшчальніцтве. Ён таксама ўзначальвае беларускую дыпламатычную місію ў Зімбабвэ.
Сяргей Мядзвецкас узгоднены на пасаду першага намесніка старшыні Гродзенскага аблвыканкама. Да гэтага часу ён працаваў старшынёй Астравецкага райвыканкама.
Пасаду намесніка старшыні Брэсцкага аблвыканкама, які курыруе пытанні будаўніцтва, транспарту і жыллёва-камунальнай гаспадаркі, зойме Аляксандр Максімчук. Раней ён быў генеральным дырэктарам Брэсцкага ЖКГ.
Астравецкі раён узначаліць Руслан Жукоўскі. Да гэтага часу ён займаў пасаду першага намесніка старшыні — начальніка ўпраўлення сельскай гаспадаркі і харчавання Смаргонскага райвыканкама.
Віталь Шулейка ўзгоднены на пасаду старшыні Слонімскага райвыканкама. Раней ён быў першым намеснікам старшыні — начальнікам упраўлення сельскай гаспадаркі і харчавання Дзятлаўскага райвыканкама.
На пасаду старшыні Шчучынскага райвыканкама ўзгоднены Ігар Аверка. Для яго гэта павышэнне з пасады першага намесніка старшыні — начальніка ўпраўлення сельскай гаспадаркі і харчавання гэтага ж райвыканкама.
Уладзіслаў Гершгорын узначаліць адміністрацыю Ленінскага раёна горада Гродна. Раней, з 2019 па 2026 год, ён кіраваў Ашмянскім раёнам.