Na składach Wildberries zhareli rečy viadomaj biełaruskaj dyzajnierki
Dyzajnierka Ludmiła Łabkova raspaviała, što na składach Wildberries zhareła bolš za piać tysiač vyrabaŭ jaje brenda.
Ludmiła Łabkova. Fota: instahram @ludmila_labkova_brand
«Fors-mažor na składach Wildberries zakranuŭ i nas — niekalki partyj, u jakija my ŭkłali dušu, źnikli za ličanyja hadziny. My nie možam vyvieźci rečy sa składaŭ — vy bačycie, što siońnia (zvarot zapisany 22 lipienia. — NN) było padarvana jašče dva. I my razumiejem, što my zhubim usio. Pakul jašče niešta zastałosia na składach, ja vas prašu, kupicie sabie toje, što vam padabajecca», — zaklikaje dyzajnierka prychilnikaŭ jaje tvorčaści.
Skrynšot: instahram @ludmila_labkova_brand
Tych, kamu adzieńnie niepatrebnaje, Ludmiła prosić usio roŭna aformić zakaz i paśla viarnuć jaho jak brak.
«Tady reč vierniecca da nas na punkty vydačy i zachavajecca da lepšych časoŭ».
Skrynšot: instahram @ludmila_labkova_brand
Ludmiła Łabkova zajmajecca modaj amal 25 hadoŭ, śpiecyjalizujecca na adzieńni dla žančyn z naturalnych materyjałaŭ, u tym liku — dla pamieraŭ plus-sajz. U 2018 hodzie jana taksama rabiła paradnuju formu dla biełaruskaj delehacyi da zimovych Alimpijskich hulniaŭ u Paŭdniovaj Karei. Na dadzieny momant na sajcie Wildberries dastupnaja 181 adzinka rečaŭ jaje aŭtarstva roznych pamieraŭ.
Pra toje, što ich tavary daharajuć na składach, padzialilisia i ŭ kampanii Made4U, jakaja vypuskaje adryŭnyja kalendary i padarunki.
Skrynšot: instahram @made4u.by
Biełaruskija kampanii, jakija sutyknulisia z padobnaj prablemaj, pa mahčymaści pierachodziać na vyhruzku vyklučna ź biełaruskich składaŭ i prodaž na ajčynnych placoŭkach.
«Heta budzie daŭžej pa časie, ale biaśpiečniej», — zahadzia papiaredžvajuć klijentaŭ.
Paciarpieła i firma Modum, jakaja zachoŭvała na składach Wildberries u Elektrastali i Katoŭsku tracinu svajoj kaśmietyki. Zakranuli ataki USU i dziasiatki inšych biznesaŭ.
Pry hetym za 11 dzion da ataki markietpłejs źniaŭ ź siabie adkaznaść za mahčymyja straty ad udaru bieśpiłotnikaŭ. Praŭda, pakul da kanca niajasna, ci zakranie heta i pradaŭcoŭ ź Biełarusi.