На складах Wildberries згарэлі рэчы вядомай беларускай дызайнеркі
Дызайнерка Людміла Лабкова распавяла, што на складах Wildberries згарэла больш за пяць тысяч вырабаў яе брэнда.
Людміла Лабкова. Фота: інстаграм @ludmila_labkova_brand
«Форс-мажор на складах Wildberries закрануў і нас — некалькі партый, у якія мы ўклалі душу, зніклі за лічаныя гадзіны. Мы не можам вывезці рэчы са складаў — вы бачыце, што сёння (зварот запісаны 22 ліпеня. — НН) было падарвана яшчэ два. І мы разумеем, што мы згубім усё. Пакуль яшчэ нешта засталося на складах, я вас прашу, купіце сабе тое, што вам падабаецца», — заклікае дызайнерка прыхільнікаў яе творчасці.
Скрыншот: інстаграм @ludmila_labkova_brand
Тых, каму адзенне непатрэбнае, Людміла просіць усё роўна аформіць заказ і пасля вярнуць яго як брак.
«Тады рэч вернецца да нас на пункты выдачы і захаваецца да лепшых часоў».
Скрыншот: інстаграм @ludmila_labkova_brand
Людміла Лабкова займаецца модай амаль 25 гадоў, спецыялізуецца на адзенні для жанчын з натуральных матэрыялаў, у тым ліку — для памераў плюс-сайз. У 2018 годзе яна таксама рабіла парадную форму для беларускай дэлегацыі да зімовых Алімпійскіх гульняў у Паўднёвай Карэі. На дадзены момант на сайце Wildberries даступная 181 адзінка рэчаў яе аўтарства розных памераў.
Пра тое, што іх тавары дагараюць на складах, падзяліліся і ў кампаніі Made4U, якая выпускае адрыўныя календары і падарункі.
Скрыншот: інстаграм @made4u.by
Беларускія кампаніі, якія сутыкнуліся з падобнай праблемай, па магчымасці пераходзяць на выгрузку выключна з беларускіх складаў і продаж на айчынных пляцоўках.
«Гэта будзе даўжэй па часе, але бяспечней», — загадзя папярэджваюць кліентаў.
Пацярпела і фірма Modum, якая захоўвала на складах Wildberries у Электрасталі і Катоўску траціну сваёй касметыкі. Закранулі атакі УСУ і дзясяткі іншых бізнэсаў.
Пры гэтым за 11 дзён да атакі маркетплэйс зняў з сябе адказнасць за магчымыя страты ад удару беспілотнікаў. Праўда, пакуль да канца няясна, ці закране гэта і прадаўцоў з Беларусі.