Navukoŭcy prymacavali videakamiery da najbujniejšych ryb u śviecie i daviedalisia pra ich šmat cikavaha
Navukoŭcy ŭpieršyniu atrymali videazapisy z žyćcia kitovych akuł pad vadoj i zrabili niečakanaje adkryćcio. Akazałasia, što najbujniejšyja ryby na płaniecie charčujucca inakš, čym mierkavałasia raniej, piša The Independent.
Zdymak ilustracyjny. Fota: magnific.com
Kab vyvučyć ich pavodziny, daśledčyki z Aŭstralijskaha instytuta marskich navuk zamacavali na śpinnych płaŭnikach kitovych akuł nievialikija kamiery. Pryłady zapisvali ŭsio, što adbyvałasia, na praciahu sutak, paśla čaho samastojna adździalalisia ad žyvioł. Zatym navukoŭcy znachodzili kamiery i analizavali atrymanyja materyjały. Taki mietad nie pryčyniaŭ akułam nijakaj škody.
Na asnovie videazapisaŭ i analizu bolš jak sotni navukovych rabot daśledčyki skłali najbolš poŭny na siońnia katałoh pavodzin kitovych akuł, jaki ŭklučaje 36 roznych typaŭ dziejańniaŭ.
Hałoŭnaje adkryćcio ŭ tym, što kitovyja akuły zdabyvajuć ježu nie tolki kala pavierchni vady. Videa pakazała, što jany aktyŭna kormiacca i na hłybini da 70 mietraŭ. Pry hetym akuły vykarystoŭvajuć roznyja sposaby pošuku ježy: mohuć pavolna ruchacca z adkrytaj paščaj, adfiltroŭvajučy drobnyja arhanizmy z vady, abo aktyŭna palavać na vialikija čarodki kryla, kali znachodziać ich.
Daśledčyki adznačajuć, što bolšuju častku času hetyja ryby charčujucca nievialikimi porcyjami, pastajanna źbirajučy korm u toŭščy vady. Kali ž jany znachodziać vialiki zboj kryla, to pierachodziać da bolš intensiŭnaha sposabu karmleńnia.
Taksama vyśvietliłasia, što kitovyja akuły vykarystoŭvajuć bolš raznastajnyja stratehii zdabyvańnia ježy, čym inšyja bujnyja žyvioły-filtratary, naprykład hihanckija akuły abo kity. Na dumku navukoŭcaŭ, heta dapamahaje im vyžyvać u trapičnych morach, dzie korm raźmiarkoŭvajecca nieraŭnamierna.
Pakul što nazirańni pravodzilisia tolki za hrupaj maładych kitovych akuł kala ryfa Ninhału ŭ Zachodniaj Aŭstralii. U budučyni daśledčyki płanujuć pastavić kamiery i na inšych asobinach u roznych rehijonach śvietu, kab lepš vyvučyć žyćcio hetaha redkaha vidu.
Čytajcie taksama:
U Aŭstralii čałaviek zahinuŭ paśla napadu akuły
Mužčyna vyžyŭ paśla žudasnaha napadu akuły na Karybach. Jon padzialiŭsia, što ź im było
U Aŭstralii masava zakryvajuć plažy z-za napadaŭ akuł. Jość užo čatyry paciarpiełyja