Jak prachodzić fiestyval Tutaka na Biełastoččynie

U piatnicu, 17 lipienia, na Padlaššy va ŭročyščy Baryk startavaŭ fest «Tutaka-2026: Svabodnyja». Jon praciahniecca try dni. «Biełsat» raskazaŭ, što adbyvałasia ŭ pieršy dzień festu i jakija padziei jašče čakajuć udzielnikaŭ.

Vystup hurta Rima na fiestyvali Tutaka. 17 lipienia 2026 hoda. Fota: Raul Dziuk / Biełsat

Heta ŭžo šosty fiestyval Tutaka. Adna z hałoŭnych źmien hetaha hoda — płatny ŭvachod. Na biełaruskija hrošy jon kaštuje prykładna 120 rubloŭ. Volnym uvachod zastajecca dla dziaciej i starejšych ludziej, jakim bolš za 65 hadoŭ.

Za takoje novaŭviadzieńnie arhanizataraŭ šmat krytykavali, ale jany tłumačać, što ličać hetaje rašeńnie vielmi važnym, bo taki padychod daje kožnamu ŭdzielniku mahčymaść adčuć svaju datyčnaść da spravy budavańnia i padtrymańnia biełaruskaj kultury.

«Dziakujučy hetamu ŭ nas źjaviŭsia stratehičny partnior, i hetym stratehičnym partnioram stali ŭsie, chto kupiŭ kvitki. Heta vielmi važna, kab my jak hramadstva razumieli adkaznaść za toje, jak my stvarajem svaju kulturu, jak my jaje padtrymlivajem. Heta takaja davoli lohkaja cahlinka, jakuju možna prosta zapłacić, i dziakujučy hetamu fiestyval budzie nadalej raźvivacca», — patłumačyŭ u kamientary «Biełsatu» arhanizatar fiestyvalu Pavieł Stankievič.

Tyja, chto nie moža ci nie choča zapłacić za ŭvachod, mohuć dałučycca ŭ jakaści vałancioraŭ, dadaŭ jon, bo «pracy jość šmat».

Majstar-kłas pa vyrabie sałamianych konikaŭ na fiestyvali Tutaka. 17 lipienia 2026 hoda. Fota: Raul Dziuk / Biełsat

Akramia muzyčnaj prahramy, na fiestyvali ŭvieś čas prachodziać majstar-kłasy, lekcyi i dyskusii. Taksama biełarusy pryvieźli na fest šmat roznych kram, u jakich možna nabyć biełaruskuju simvoliku. Naprykład, pravaabaronca Nasta Bazar «trochi pierakvalifikavałasia», zrabiła cišotki z «Pahoniaj» i pradaje ich.

Nasta Bazar na fiestyvali Tutaka. 17 lipienia 2026 hoda. Fota: Raul Dziuk / Biełsat

Kiraŭnica fondu «Prytulaj mianie», dyrektarka i zasnavalnica šełtara dla biełaruskich palitviaźniaŭ Hanna Fiedaronak pryviezła na fiestyval biełaruskija suvieniry, zroblenyja rukami pracaŭnikoŭ fondu i žycharoŭ šełtara.

«Usio heta my nie pradajom, a mianiajem na danaty i źbirajem takim čynam hrošy dla šełtara», — patłumačyła «Biełsatu» spadarynia Hanna.

Hanna Fiedaronak na fiestyvali Tutaka. 17 lipienia 2026 hoda. Fota: Raul Dziuk / Biełsat

U pieršy dzień fiestyvalu možna było pasłuchać lekcyju hiendarnaj daśledčycy Iryny Sidorskaj pad nazvaju «Nie z nula: što nasamreč značyć pačynać žyćcio ŭ emihracyja paśla saraka», paŭdzielničać u arhanizavanaj Instytutam biaśpiekavych daśledavańniaŭ imia Kaściuški dyskusii «Kolki biełarusaŭ i biełarusak u Jeŭropie», zadać svaje pytańni śpiavačcy Anastasii Rydleŭskaj, navučycca rabić sałamianych konikaŭ i paśpiavać prypieŭki z Volhaj Baryšnikavaj.

Iryna Sidorskaja čytaje lekcyju na fiestyvali Tutaka. Fota: Raul Dziuk / Biełsat

Niefarmalnaja sustreča z Anastasijaj Rydleŭskaj na fiestyvali Tutaka. Fota: Raul Dziuk / Biełsat

Dyskusija pra mahčymaść kruhłaha stała pamiž uładaj i apazicyjaj na fiestyvali Tutaka. 17 lipienia 2026 hoda. Fota: Raul Dziuk / Biełsat

Skončyŭsia pieršy dzień muzyčnaju prahramaju. Raspačynaŭ jaje miascovy muzyčny hurt Rima, zatym udzielniki mahli atrymać asałodu, słuchajučy Anastasiju Rydleŭskuju.

Prysutnych ździviŭ palityk Pavieł Sieviaryniec, jaki pračytaŭ rep.

Pavieł Sieviaryniec čytaje rep na fiestyvali Tutaka. 17 lipienia 2026 hoda. Skrynšot: Pavieł Sieviaryniec/TH

Vystup hurta Anastasii Rydleŭskaj na fiestyvali Tutaka. 17 lipienia 2026 hoda. Fota: Raul Dziuk / Biełsat

Ludzi słuchajuć vystup hurta Anastasii Rydleŭskaj na fiestyvali Tutaka. 17 lipienia 2026 hoda. Fota: Raul Dziuk / Biełsat

U subotniaj prahramie fiestyvalu — turnir pamiaci vydatnaha biełaruskaha mastaka Alesia Puškina; prahlad mastackaha filmu Mary Tamkovič «Pad šerym niebam», natchnionaha historyjaj žurnalistaŭ Kaciaryny Andrejevaj i Ihara Iljaša; dyskusija pra toje, chto moža abjadnać biełarusaŭ; sustreča z byłym palitviaźniem Maksimam Znakam i demakratyčnaj lidarkaj Śviatłanaj Cichanoŭskaj, a taksama zorkami «Biełsatu» ŭ farmacie papularnaj prahramy «Tut i tam».

Vystup hurta Rima na fiestyvali Tutaka. 17 lipienia 2026 hoda. Fota: Raul Dziuk / Biełsat

Muzyčnaj kulminacyjaj subotniaha viečara buduć vystupy samabytnaha fołk-chip-chop-prajektu Chornabrova, repiera Vinsent'a i hurta haradzienskich pank-buntaroŭ «Dzieciuki».

Kamientary da artykuła