Tłušč pamierłych ludziej staŭ novym trendam u kaśmietałohii
U ZŠA nabiraje papularnaść novaja kaśmietyčnaja pracedura, padčas jakoj dla karekcyi fihury vykarystoŭvajuć tłušč, atrymany ad pamierłych donaraŭ. Čamu na jaho ŭźnik popyt, ci biaśpiečnaja hetaja pracedura i dzie prachodzić etyčnaja miaža, raźbirałasia CNN.
Kałaž ź ilustracyj, raźmieščanych na sajcie vytvorcy alloclae.com
Usio bolš amierykancaŭ źviartajucca da preparata alloClae — injekcyjnaha napaŭnialnika, vyrablenaha z donarskaha tłušču pamierłych ludziej. Vytvorca śćviardžaje, što z maja 2025 hoda im užo skarystalisia bolš za dźvie tysiačy pacyjentaŭ, a cikavaść da pracedury praciahvaje raści.
Preparat vykarystoŭvajuć dla pavieličeńnia abjomu hrudziej, jahadzic, tvaru i inšych častak cieła. Vytvorcy pazicyjanujuć jaho jak alternatyvu silikonavym impłantam, sintetyčnym fileram i pierasadcy ŭłasnaha tłušču. Pracedura nie patrabuje lipasakcyi, ahulnaj aniestezii i praciahłaha adnaŭleńnia, doŭžycca mienš za hadzinu i pravodzicca ambułatorna.
Pachudańnie stvaryła novy popyt
Rost papularnaści alloClae šmat u čym źviazvajuć z raspaŭsiudžańniem preparataŭ dla pachudzieńnia, takich jak Ozempic i Wegovy. Paśla značnaj straty vahi mnohija ludzi hublajuć nie tolki lišni tłušč, ale i abjom u hrudziach, tvary abo jahadzicach.
Płastyčnyja chirurhi adznačajuć, što pacyjenty ŭsio čaściej chočuć nie prosta schudnieć, ale i adnavić stračany abjom u peŭnych častkach cieła. Mienavita dla hetaha i prapanujuć vykarystoŭvać donarski tłušč.
AlloClae — nie pieršy preparat takoha typu. Kala dziesiaci hadoŭ tamu na rynku źjaviŭsia anałahičny srodak Renuva. Adnak maksimalny špryc źmiaščaŭ tolki try kubičnyja santymietry preparata, tamu jaho vykarystoŭvali pieravažna dla nievialikich učastkaŭ — ruk, tvaru i šyi.
Najbujniejšy špryc alloClae źmiaščaje kala 22 kubičnych santymietraŭ, što dazvalaje vykarystoŭvać jaho dla karekcyi hrudziej, jahadzic i inšych bujnych zon cieła.
Košt adnaho špryca alloClae abjomam 12,5 kubičnaha santymietra moža dasiahać prykładna 2250 dalaraŭ, a poŭnaja pracedura niaredka abychodzicca ŭ dziasiatki tysiač dalaraŭ.
Nie biez ryzyki
Jak i lubaja pracedura pa pavieličeńni abjomu tkanak, vykarystańnie alloClae moža pryvodzić da ŭskładnieńniaŭ.
CNN pryvodzić historyju žančyny, jakaja paśla pavieličeńnia hrudziej sutyknułasia ź niekrozam tłuščavaj tkanki: častka ŭviedzienaha materyjału nie pryžyłasia, źjavilisia balučyja ŭščylnieńni, a paźniej daviałosia ich vydalić.
Vytvorca zajaŭlaje, što paćvierdžanych vypadkaŭ nieprymańnia abo infiekcyj nie zafiksavana, adnak pryznaje, što vynik šmat u čym zaležyć ad techniki ŭviadzieńnia preparatu.
Niekatoryja płastyčnyja chirurhi taksama ličać, što pakul rana rabić vysnovy pra doŭhaterminovuju biaśpieku novaj mietodyki. Jany adznačajuć, što nieabchodnyja bolš maštabnyja kliničnyja daśledavańni i praciahłaje nazirańnie za pacyjentami.
Adkul biaruć donarski tłušč
Vytvorca preparatu, kampanija Tiger Aesthetics, zapeŭnivaje, što vykarystoŭvaje tkanki ludziej, jakija pry žyćci pahadzilisia na donarstva svajho cieła paśla śmierci. Donary mohuć vyznačyć, ci dazvalajuć vykarystoŭvać svaje tkanki tolki dla navukovych i miedycynskich daśledavańniaŭ abo taksama ŭ kamiercyjnych metach. Pravierka miedycynskich dakumientaŭ i dopusk materyjału da vykarystańnia zajmajuć ad troch da šaści miesiacaŭ, a padčas vytvorčaści z tkanki vydalajuć kletki i DNK donara.
Adnak sistema vykarystańnia tkanak pamierłych ludziej u ZŠA rehulujecca značna mienš stroha, čym donarstva orhanaŭ. Kali transpłantacyja orhanaŭ znachodzicca pad strohim fiederalnym kantrolem, to dla arhanizacyj, jakija prymajuć cełyja cieły, i bankaŭ tkanak nie isnuje adzinaj abaviazkovaj sistemy fiederalnaj akredytacyi abo licenzavańnia. Heta aznačaje, što sotni takich ustanoŭ pracujuć biez adzinaha ahulnanacyjanalnaha nahladu.
Mienavita heta i vyklikaje častku etyčnych pytańniaŭ. Bijaetyki ličać, što vykarystańnie achviaravanych tkanak u kamiercyjnych metach moža supiarečyć samoj idei donarstva jak bieskaryślivaha ŭčynku.
Na hetym fonie ŭźnikła i pravavaja sprečka vakoł alloClae. Ułady štata Ńju-Jork admovili vytvorcu ŭ licenzii na raspaŭsiudžvańnie preparatu, zajaviŭšy, što niezrazumieła, ci adpaviadaje jon patrabavańniam rehulavańnia. Tiger Aesthetics nie pahadziłasia z hetym i asprečvaje rašeńnie ŭ sudzie.
Ci stanie vykarystańnie tłušču pamierłych novaj normaj
Niekatoryja płastyčnyja chirurhi pryznajucca, što čakali značna bolš niehatyŭnaj reakcyi na vykarystańnie tłušču pamierłych ludziej. Adnak na praktycy bolšaść pacyjentaŭ amal nie cikavicca pachodžańniem materyjału.
Kulturołah Arabiel Sikardzi, aŭtar knihi «Dom pryhažości» («The House of Beauty»), nazvała alloClae «žachliva zručnym» i paraŭnała jaho z čymści sa śvietu filma žachaŭ «Substancyja» (2024).
Na jaje dumku, adsutnaść składanaj apieracyi i praciahłaha adnaŭleńnia prymušaje ludziej mienš zadumvacca pra toje, što preparat vyrableny z tkanak pamierłych.
«Heta śviedčyć pra toje, što my addajom pryjarytet zručnaści, vykarystoŭvajučy materyjały pamierłych. Heta prosta novaja viersija staražytnaha impulsu. Kaliści ludzi jeli cieły pamierłych, ciapier — uvodziać ich u svaje cieły», — rezka farmuluje svajo mierkavańnie Sikardzi.
U Tiger Aesthetics ličać, što alloClae varta ŭsprymać nie jak napamin pra śmierć, a jak srodak, jaki dapamahaje ludziam daŭžej zachoŭvać žadany vyhlad. U kampanii ŭpeŭnienyja, što preparat čakaje toj samy šlach, jaki raniej prajšli botaks i filery: toje, što siońnia zdajecca niezvyčajnym, z časam moža stać zvyčajnaj kaśmietyčnaj praceduraj.