Makron paabiacaŭ dać Ukrainie licenziju na vyrab francuzskich rakiet

Prezident Francyi Emanuel Makron paviedamiŭ, što Francyja daść Ukrainie licenzii na vytvorčaść francuzskich rakiet. Pra heta jon zajaviŭ padčas sumiesnaj pres-kanfierencyi z prezidentam Ukrainy Uładzimiram Zialenskim, a taksama lidarami Vialikabrytanii i Hiermanii Kiram Starmieram i Frydrycham Miercam, paviedamlaje «Jeŭrapiejskaja praŭda».

Uładzimir Zialenski i Emanuel Makron. Fota: Tom Nicholson / Pool Photo via AP

Pa słovach Makrona, havorka idzie pra licenzijnuju vytvorčaść rakiet Aster, jakija vykarystoŭvajucca ŭ zienitnych rakietnych kompleksach SAMP/T, raspracavanych Francyjaj sumiesna ź Italijaj. Jon taksama adznačyŭ, što niekalki inšych krain užo pryniali padobnyja rašeńni ab pieradačy Ukrainie licenzij na vytvorčaść uzbrajeńnia.

Francuzski prezident paviedamiŭ, što razam z Uładzimiram Zialenskim jany zaćvierdzili darožnuju kartu dvuchbakovaha supracoŭnictva, jakaja praduhledžvaje dalejšaje raźvićcio ŭzajemadziejańnia ŭ śfiery supraćpavietranaj abarony. U jaje ramkach Ukraina nabudzie pieršuju partyju sistem SAMP/T novaha pakaleńnia, jakija dapoŭniać užo zapłanavanyja pastaŭki srodkaŭ supraćpavietranaj abarony.

U svaju čarhu Uładzimir Zialenski padziakavaŭ Francyi za rašeńnie pieradać licenzii na vytvorčaść rakiet Aster i SCALP, nazvaŭšy hety krok važnym dla ŭmacavańnia abaranazdolnaści krainy.

Raniej prezident ZŠA Donald Tramp taksama paviedamiŭ, što Vašynhton hatovy dać Ukrainie prava na vytvorčaść rakiet-pierachopnikaŭ dla sistem Patriot. Pavodle paviedamleńniaŭ ŚMI, ich vypusk, chutčej za ŭsio, budzie arhanizavany na terytoryi adnoj ź jeŭrapiejskich krain, siarod jakich razhladajecca Hiermanija.

Kamientary da artykuła