Biełarusa prymusova departavali z Rasii. A jon palez nazad praz 50 chvilin
Sud uličyŭ pryznańnie viny Michaiła Dziemidoviča i daŭ jamu paŭtara hoda kałonii dla recydyvistaŭ.
Pierachod «Dołascy». Fota: maps.yandex.by
Siebiežski rajonny sud Pskoŭskaj vobłaści asudziŭ hramadzianina Biełarusi Michaiła Dziemidoviča na 1 hod 6 miesiacaŭ pazbaŭleńnia voli za paŭtornaje niezakonnaje pierasiačeńnie rasijskaj miažy paśla departacyi.
Dziemidovič užo mieŭ try sudzimaści ŭ Rasii — za zamach na rabavańnie, kradziež i niezakonnaje pierasiačeńnie miažy. Paśla apošniaj adsiedki jamu paviedamili, što ŭjezd u Rasiju jamu zabaronieny na dziesiać hadoŭ.
U kancy 2023 hoda Biełarusa departavali z Rasii pa moście praz raku Čarapiecica ŭ Siebiežskim rajonie Pskoŭskaj vobłaści. Heta było ŭ 17:40.
Ale kali Dziemidovič apynuŭsia ŭ Biełarusi, jon adrazu ž vyrašyŭ viartacca. Jon rušyŭ pieššu nazad da miažy i kala 18:30 znoŭ pierasiok jaje kala pierachoda «Dołascy».
Zatrymali jaho ŭ toj ža dzień.
Na sudzie Dziemidovič pryznaŭ vinu i chadajničaŭ ab asablivym paradku razhladu spravy — biez sudovaha śledstva. Prakuror nie piarečyŭ. Psichijatryčnaja ekśpiertyza nie vyjaviła ŭ jaho psichičnych rasstrojstvaŭ, jakija b vyklučali adkaznaść, choć jon i nazirajecca ŭ psichijatra z dyjahnazam «lohkaja razumovaja adstałaść».
Sud uličyŭ pryznańnie viny i aktyŭnaje sadziejničańnie śledstvu jak źmiakčalnyja akaličnaści, ale taksama i recydyŭ złačynstvaŭ — jak abciažarvalnuju.
U vyniku 25 studzienia 2024 hoda Dziemidoviča pryhavaryli da paŭtara hoda kałonii strohaha režymu.