Čym zojmucca vypuskniki biełaruska-kitajskaj prahramy, jakuju skončyŭ Kola Łukašenka

Vypuskniki pieršaj sumiesnaj prahramy BDU i Piekinskaha ŭniviersiteta pa śpiecyjalnaści «bijatechnałohija» viarnulisia dadomu. Dypłomy im uručyli na minułym tydni ŭ prysutnaści Alaksandra Łukašenki — baćki adnaho z vypusknikoŭ prahramy. Rektar BDU Andrej Karol u efiry «Pieršaha infarmacyjnaha» raspavioŭ pra ich dalejšyja pierśpiektyvy.

Na minułym tydni vypusknikam pieršaj sumiesnaj prahramy Biełaruskaha dziaržaŭnaha ŭniviersiteta i Piekinskaha ŭniviersiteta pa śpiecyjalnaści «bijatechnałohija» ŭručyli dypłomy ŭ Kitai. U tym liku Mikałaju Łukašenku.

Kola z čatyrma inšymi chłopcami vučyŭsia adrazu ŭ dvuch univiersitetach. Jak paviedamlaje dziaržTB, jany zdavali siesii na troch movach, pryvykali da inšaj sistemy adukacyi, pracavali ŭ łabaratoryjach z abstalavańniem, «anałahaŭ jakoha ŭ Jeŭropie niama».

Andrej Karol, rektar Biełaruskaha dziaržaŭnaha ŭniviersiteta, raskazaŭ, što skončyli adukacyjnuju prahramu 22 čałavieki, ź ich — 18 z adznakaj.

«Ź ich 5 čałaviek my kalehijalna ź Piekinskim univiersitetam adabrali dla navučańnia ŭ sumiesnaj mahistratury. Chtości pojdzie ŭ mahistraturu, jakaja zaraz jość, chtości pojdzie na pieršaje miesca pracy. Popyt vielmi vialiki na samaj spravie — heta tyja ž samyja «Biełmiedpreparaty», heta i Akademija navuk, to-bok tyja instytuty, jakija zacikaŭleny ŭ tym, kab było śviežaje dychańnie, kab hetyja ŭschody davali toj uradžaj, na jaki ŭsie raźličvajuć».

Ci pojdzie Kola ŭ mahistraturu, nie paviedamlajecca.

Kamientary da artykuła