Ukrainski vajskoviec: Scenaryj 2022 hoda, kali išli kałony ź Biełarusi, ciapier nierealistyčny
«Techniku ŭ takim farmacie na froncie ŭžo nie vykarystoŭvajuć, kałony prosta źniščać na podstupach».
Rasijskija tanki zajazdžajuć va Ukrainu z boku Biełarusi praz pamiežny pierachod «Try siastry», 24 lutaha 2022 hoda. Pablizu ŭstalavany manumient u honar družby biełaruskaha, ruskaha i ŭkrainskaha narodaŭ. Skrynšot videa
Namieśnik kamandzira ŭkrainskaha pałka bieśpiłotnych sistem Kraken Kanstancin Niamičaŭ kaža, što z boku Biełarusi jość niekalki pahroz, ale scenaryj 2022 hoda ciapier nierealistyčny.
«Pieršy [varyjant] — pahroza dla pryhraničča Ukrainy. Druhi — Bałtyjskija krainy, jakija miažujuć ź Biełaruśsiu. Rasija razhladaje Suvałkski kalidor jak mahčymaść zachopu i adrazańnia Bałtyi ad Jeŭropy pa sušy.
Treci varyjant — heta manipulacyja. Jany pravodziać vučeńni, kapajuć pazicyi, kab zmusić nas adciahnuć vojski z frantavoj častki Ukrainy i raściahnuć našy siły, — pieraličaje Niamičaŭ u intervju «RBK-Ukraina». —
Jaki varyjant spracuje — nieviadoma, ale naša zadača — rychtavacca. Na miažy ź Biełaruśsiu naša abarončaja linija hatovaja. Kali RF razam ź Biełaruśsiu pasprabuje ruchacca ŭ naš bok, našy bieśpiłotnyja sistemy i piachotnyja bryhady zrobiać usio, kab hetaja kałona była źniščana razam z technikaj i asabovym składam. Tady ŭ nas raźviažucca ruki dla naniasieńnia udaraŭ pa centrach pryniaćcia rašeńniaŭ u Biełarusi».
Namieśnik kamandzira ŭkrainskaha pałka bieśpiłotnych sistem Kraken Kanstancin Niamičaŭ. Skrynšot videa: RBCUkraine / YouTube
Scenaryj 2022 hoda, kali kałony išli pa Kijeŭskaj ci Čarnihaŭskaj abłaściach, ciapier nierealistyčny, kaža ŭkrainski vajskoviec.
«Techniku ŭ takim farmacie na froncie ŭžo nie vykarystoŭvajuć, kałony prosta źniščać na podstupach.
Hłabalnaj pahrozy bujnym haradam z boku Biełarusi na dadzieny momant niama praz tuju kolkaść sił, jakaja tam raźmieščana. Jany mohuć nazapašvać resursy, mahčymyja sproby zachodu na pryhraničnyja terytoryi, u maleńkija harady i vioski (jak heta robicca ŭ Charkaŭskaj i Sumskaj abłaściach dla stvareńnia tak zvanaj bufiernaj zony).
Na hetuju pahrozu treba adekvatna reahavać, što my i robim».