Hučna anansavany Ryžankovym baskietbolny kłub «Šachcior» zbankrutavaŭ praz dva hady paśla zasnavańnia

Salihorski baskietbolny kłub «Šachcior» ŭ farmacie 3x3 stvaraŭsia pry padtrymcy «Biełaruśkaliju» i padavaŭsia jak praryŭ dla biełaruskaha baskietboła: baza dla nacyjanalnaj zbornaj 3x3, zasłužany trenier z Rasii, udzieł u rasijskaj lizie. Vynik, adnak, biazradasny — navat nie zrazumieła, ci raźličylisia z trenieram. 

Fota: sb.by

Jak stała viadoma «Našaj Nivie», učora, 24 červienia, u Ekanamičnym sudzie Minskaj vobłaści ŭ sproščanym paradku byŭ pryznany bankrutam baskietbolny kłub «Šachcior».

Daŭhi kłuba trochi bolš čym miljon rubloŭ, a aktyvaŭ zastałosia ŭsiaho na 20 tysiač. 

Pry hetym pačynałasia ŭsio pafasna — «Šachcior» prezientavali jak vitrynu mužčynskaha baskietboła ŭ Biełarusi. 

Kłub byŭ zasnavany ŭ listapadzie 2023-ha. Maksim Ryžankoŭ — tady pieršy namieśnik kiraŭnika administracyi Łukašenki i adnačasova staršynia baskietbolnaj fiederacyi — nazyvaŭ heta važnym krokam u historyi biełaruskaha baskietboła i śćviardžaŭ, što mienavita ŭ Salihorsku stvoranyja «najlepšyja ŭmovy» dla padrychtoŭki zbornaj.

Pad prajekt zaprasili zasłužanaha treniera Rasii Uładzimira Ahababjana — taho samaha, ź jakim rasijskaja zbornaja za dva hady da taho zavajavała srebra Alimpijady ŭ Tokia.

Ahabab́jan zachaplaŭsia bazaj: maŭlaŭ, takich umoŭ dla trenirovak niama navat u mnohich rasijskich kamand.

«Šachcior» staŭ pieršaj zamiežnaj kamandaj u čempijanacie Rasii pa baskietbole 3ch3. Z najbolšych pośpiechaŭ: vyjhrany adkryty čempijanat Sankt-Pieciarburha. 

Fota: BiełTA

Ale družyny kłasičnaha baskietboła na bazie kamandy 3ch3 tak i nie źjaviłasia, a ciapier pierastaje isnavać i heta kamanda. 

Aficyjnych tłumačeńniaŭ adnosna pryčyn likvidacyi kłuba pakul nie davałasia. 

Kamientary da artykuła