U Vasila Vieramiejčyka, vierahodna, byŭ infarkt

Jaŭhienija, žonka byłoha dobraachvotnika Vasila Vieramiejčyka, raskazała «Našaj Nivie» pra ciažki stan jaho zdaroŭja. Praz surjoznyja prablemy z sercam palitviaźnia ŭžo dadali ŭ humanitarnyja śpisy.

Prablemy ŭ Vasila pačalisia, jašče kali jon znachodziŭsia ŭ SIZA. Tady Vieramiejčyk skardziŭsia na simptomy, što ŭkazvajuć na prablemy z sercam: bol u hrudziach, dychavica, hałavakružeńnie, acioki ruk i noh. Miedycynskaj dapamohi ŭ SIZA jamu nie akazali.

U 2025 hodzie Vieramiejčyku prysudzili 13 hadoŭ kałonii i pavieźli adbyvać toj termin u škłoŭskuju kałoniju №17. Tam Vasilu narešcie zrabili abśledavańnie — uziali analizy i praviali UHD serca. Dakładnych vynikaŭ siamja mužčyny nie viedaje, ale paśla taho abśledavańnia Vieramiejčyku pryznačyli kropielnicy i vypisali ažno čatyry mocnyja preparaty: aśpikard, kłopidahreł, atorvastatyn i mietaprałoł.

Jaŭhienija padzialiłasia zaklučeńniem niezaležnaha doktara na asnovie infarmacyi pra stan Vasila:

«Jość prykmiety surjoznaha sardečna-sasudzistaha zachvorvańnia, vierahodna, išemičnaj pryrody, z vysokaj ryzykaj trambatyčnych uskładnieńniaŭ. Pryznačanaja terapija (antyahrehanty, bieta-błakatary, statyny) charakternaja dla pacyjentaŭ paśla infarktu mijakarda abo z vysokaj ryzykaj jaho raźvićcia. Stan patrabuje pastajannaha miedycynskaha nazirańnia i moža horšać va ŭmovach izalacyi».

Situacyju ŭskładniaje toje, što ŭ Vieramiejčyka spadčynnaja schilnaść da sardečna-sasudzistych chvarobaŭ. U jaho blizkich svajakoŭ byli vypadki infarktaŭ i ciažkich apieracyj.

Jašče adnoj prykmietaj stanu Vasila jaho rodnyja ličać toje, što Vieramiejčyka ŭ kałonii doŭhi čas nie adpraŭlali ŭ ŠIZA, chacia tudy časta traplajuć palitviaźni i ź mienš ciažkimi artykułami. Administracyja kałonii ŭdakładniała, što Vasil paźbiahaŭ ŠIZA praź jahonyja prablemy z sercam.

Viasnoj 2026‑ha ŭsio źmianiłasia — rodnyja Vieramiejčyka bačać pa abmiežavańniach u kamunikacyi i inšych prykmietach, što palitviaźnia ŭžo niekalki razoŭ adpraŭlali ŭ ŠIZA. Jaho taksama pazbavili telefanavańniaŭ, praduktovych i miedycynskich pieradač.

Pavodle słoŭ Jaŭhienii, u pačatku červienia Vasila musili pieravieści ŭ balnicu pry minskim SIZA-1, kab zrabić jamu apieracyju na sercy. Ale zamiest hetaha palitviaźnia kinuli ŭ ŠIZA, a potym i ŭvohule ŭ PKT.

Tam Vasil budzie jašče bolš izalavany ad miedyčnaj dapamohi, u tym liku ekstrannaj. Ciažkija ŭmovy ŭ PKT — toje ž ŠIZA, tolki ź nievialikimi pasłableńniami — niebiaśpiečnyja tym, što jaho serca, jakoje i tak pracuje na miažy, budzie pad jašče bolšaj ryzykaj.

Pavodle Jaŭhienii, Vasila Vieramiejčyka dadali ŭ humanitarny śpis palitviaźniaŭ z surjoznymi prablemami sa zdaroŭjem, što patrabujuć jak maha chutčejšaha vyzvaleńnia.

Kamientary da artykuła