Siryjski inviestar ukłaŭsia ŭ kałhas-bankrut na Brasłaŭščynie. Jaki vynik?
Dziaržaŭnyja ŚMI try hady tamu hučna anansavali prajekt siryjskich inviestaraŭ u Brasłaŭskim rajonie: paviedamlałasia, što siryjskija inviestary vykupili na konkursnych tarhach zbankrutavany dziaržaŭny vytvorča-majomasny kompleks «Miežany» amal za 702 tysiačy rubloŭ.
Inviestary prezientujuć prajekt u Brasłaŭskim rajvykankamie, luty 2023 hoda. Fota: braslav-star.by
Inviestary abaviazalisia nie mienš za piać hadoŭ zachoŭvać sielhasśpiecyjalizacyju, štohod układać nie mienš za 300 tysiač rubloŭ i zachavać, a taksama pašyryć kolkaść pracoŭnych miescaŭ.
Da taho «Miežany» śpiecyjalizavalisia na vyroščvańni trusikaŭ i vyrabie małaka, siryjcy ž płanavali dadatkova zapuścić taksama aviečkahadoŭlu.
Sam kompleks składaŭsia z 12 fiermaŭ, mieŭ amal 13 tysiač hiektaraŭ ziamli ŭ rasparadžeńni.
Budynki fiermaŭ «Ekzit prajm». Fota: BiełTA
Praz try hady kompleks pad novym kiravańniem nie tolki nie vyjšaŭ na samaakupnaść, ale stabilna nie moža raźličycca z pastaŭščykami, pajšoŭšy u minus.
Stanam na 12 červienia 2026‑ha zapazyčanaść «Ekzit prajm» składaje 737,6 tysiačy rubloŭ, tady jak usie aktyvy — 579,3 tysiačy rubloŭ. Usie supracoŭniki zvolnieny, zastaŭsia tolki dyrektar. Pastaŭščyki i kredytory sprabujuć spahnać svaje hrošy praz sud.
Dla spraviadlivaści treba skazać, što chacia ŭ dziaržaŭnaj presie prajekt padavaŭsia jak «siryjski», u realnaści ŭ «Ekzit prajm» dva ŭłaśniki, i adzinamu ź ich siryjcu — Sietachi Hajsamu — naležyć tolki 24% akcyj. Astatniaje — u minčuka Mikałaja Sopina.