Biełaruski pačali fłešmob — pościać svaje foty ŭ karotkich šortach. Pryčynaj staŭ adzin niepryjemny kamientar
Žančyny vyrašyli abaranić prava adna adnoj nie chavać nohi.
Fota: i_a.furs, yarnahandicraft, zhannazhalevich / Threads
Usio pačałosia z pasta ŭ Threads, jaki pakinuła karystalnica pad nikam jablynevy.kvecen. Biełaruska sustreła stałuju žančynu ŭ šortach, i jaje heta tak aburyła, što jana nie zmahła zmaŭčać:
«Ja, kaniešnie, usio razumieju: leta, śpioka daŭhačakanaja. Ale vybačcie: našto ciociam 60+ karotkija šorty? Kudy? Ščyra, mnie nie duža pryjemna na takoje hladzieć, asabliva jak tam varykoz jaki, tonusu niama.
Pieršy raz takoje dziva bačyła, dy jašče takija karotkija. Vidać, dačnica niejkaja staličnaja. Da junych dziaŭčat na vydańni u takim styli pytańniaŭ niama».
Publikacyja žančyny mienš čym za sutki atrymała amal 300 kamientaroŭ. Tolki niekalki ź ich byli ŭ padtrymku aŭtarki pasta, usie astatnija — u padtrymku nieviadomaj žančyny ŭ šortach.
Aŭtarcy raili, kali joj niepryjemna bačyć takich žančyn, zapluščyć vočy i nie hladzieć na ich, a taksama adznačali, što jana čamuści nie piša pra varykoz i adsutnaść tonusu na mužčynskich nahach:
«Jedzie sabie žančyna pa svaich spravach, a tut niejkaja pra jaje varykoz piša ŭ siecivie — voś heta kultura».
«Usie viedajuć: paśla 40 kabiety pavinny zakrucicca ŭ miašok dy paŭźci na mohiłki. A to navydumlali tut šorty niejkija nasić, sapraŭdy!»
«Daju biaspłatnuju paradu: nie vychodźcie z domu da zimy! I ŭ nijakim vypadku nie chadzicie na rečku ci na voziera kupacca — tam ludzi 60 hadoŭ chodziać zusim biez vopratki, hetki žach!»
Kamientarami sprava nie skončyłasia, i biełaruski pačali publikavać ułasnyja foty ŭ šortach.
Adna žančyna pryznałasia, što ŭ jaje prablemy ź vienami pačalisia zusim nie ŭ 60, a našmat raniej, ale heta nie pieraškadžaje joj nasić toje, što chočacca:
«U mianie nikoli nie było chudych noh, varykoz z 12 hadoŭ. Kolki brydoty ja słuchała i čuju da hetaha momantu ŭ svoj adras! U listapadzie byŭ niervovy zryŭ, bo ja znoŭ nie takaja. Dziakuj mužu, jaki dapamoh heta pieražyć. Časam starajusia schudnieć, ale potym nabiraju vahu znoŭ.
Sumna, što kolki zaŭhodna možna pisać pra dušu i charaktar, ale znojducca ludzi, jakija zaŭsiody skažuć niešta złoje za śpinoj. Dziakuj, biełaruski treds, što zastupilisia za nieznajomuju šaścidziesiacihadovuju kabietu ŭ karotkich šortach!»
Inšaja biełaruska adznačyła, što karotkija šorty — daloka nie adzinaja reč, jakuju varta dazvolić adna adnoj:
«Dyk što reabilitujem nastupnym? Basanožki z adkrytymi palcami? Adkrytyja plečy? Moža, biełyja štany, jakija «taŭściać»? Abo kupalniki paśla 40?
Ci praviła «ruki treba chavać paśla peŭnaha ŭzrostu»? A moža, kaleni? O, biednyja žanočyja kaleni taksama nie raz traplali pad razdaču. Uvohule, čym daŭžej žyvu, tym bolš ździŭlajusia, kolki kompleksaŭ nam paśpieli naviazać».
Błohierka Kaciaryna Cholcapfel-Varažun razvažaje, jaki musić być padychod da źniešnaści inšych:
«Kali nie razhladvać tak detalna inšych ludziej, a bolš uvahi źviartać na toje, što ja dumaju pra samu siabie — mnie zdajecca, ad hetaha budzie bolš karyści i bolš pryjemnaści».
Aŭtarka pasta, ź jakoha ŭsio pačałosia, zdajecca, užo hatovaja pahadzicca z amatarkami šortaŭ — i navat nie suprać zapościć fota ŭ ich:
«Nie, nu, raz pajšła takaja plaska, to choć ty sama idzi dy kupi karotkija džynsavyja šorty, što spadabalisia ź pieršaha pohladu».
Čytajcie taksama:
Praz tydzień u Biełarusi moža być +38°S
Moža, vam treba 12‑pakajovaja kvatera ŭ Minsku? Majem taki varyjant
«30 tysiač užo addaŭ za arendu». Prahramist usio paličyŭ i ŭziaŭ ipateku ŭ Vilni