«Možaš zabycca ab pracy ŭ Kitai». Biełarusku abvinavacili ŭ Kitai ŭ rasiźmie praz adno nieadnaznačnaje FOTA

Biełaruskaja DJ i madel, viadomaja pad psieŭdanimam SixNineForTwanty, raspaviała pra chvalu krytyki z boku kitajskich karystalnikaŭ sacsietak. Pryčynaj staŭ fotazdymak, jaki častka aŭdytoryi paličyła rasisckim. Dziaŭčyna atrymała patrabavańni vydalić post i papiaredžańni, što taki skandał moža niehatyŭna paŭpłyvać na jaje budučyniu ŭ Kitai.

Fota: sixninefortwanty / Instagram

SixNineForTwanty vystupaje jak dydžej u žanry tech house u roznych haradach Paŭdniova-Uschodniaj Azii. 

Miarkujučy pa instahramie dziaŭčyny, jašče ŭ mai jana znachodziłasia ŭ Huančžou, a z pačatku červienia žyvie ŭ Hankonhu. Jana aktyŭna padarožničaje pa rehijonie i padtrymlivaje suviaź z kitajskaj aŭdytoryjaj praz sacyjalnyja sietki.

Pra kanflikt dziaŭčyna raspaviała ŭ storys. Pavodle jaje słoŭ, paśla publikacyi adnaho z fotazdymkaŭ na jaje abrynułasia chvala krytyki ŭ kitajskim siehmiencie internetu.

«Ujavicie sabie: z-za hetaj fatahrafii ŭ mianie prablemy ŭ kitajskim instahramie. Mianie ckujuć kitajskija karystalniki, bo ličać, što ja raspalvaju rasavuju vajnu ŭ ich infapoli. Taksama jany paskardzilisia nie tolki na maje pasty, ale i na fatohrafa, jaki sprabavaŭ mianie abaranić, što heta prosta pryhožy kadr, bieź niejkaha asablivaha padtekstu», — napisała jana.

Toj skandalny zdymak. Fota: sixninefortwanty / Instagram

SixNineForTwanty apublikavała skrynšoty razmovy z adnym z krytykaŭ.

«Ty mianie taksama asudžaješ?» — spytała jana.

«Kali chočaš zastavacca ŭ Kitai, vydali heta», — adkazaŭ surazmoŭca.

Na pytańnie, ci sapraŭdy jon ličyć, što fatahrafija była zroblena śpiecyjalna dla taho, kab abrazić azijataŭ, toj adkazaŭ: «Mnie ŭsio roŭna. Heta adčuvalnaja tema. Nie staŭ na kon svaju budučyniu».

Paźniej surazmoŭca pajšoŭ jašče dalej.

«Kali ty źbiraješsia svarycca z usioj Uschodniaj Azijaj, tady nie vydalaj heta».

Kali błohierka pacikaviłasia, ci sapraŭdy jaje budučynia moža zaležać ad adnaho pasta ŭ RedNote, pad jakim niechta adčuŭ siabie dyskryminavanym, jana atrymała karotki adkaz:

«Tak».

«Kali takoje fota raspaŭsiudzicca, možaš zabycca pra pracu ŭ Kitai. Nichto nie zachoča ciabie najmać», — napisali joj.

Sama SixNineForTwanty pryznałasia, što pieršapačatkova ličyła pryčynaj abureńnia podpis pad fatahrafijaj, dzie zhadvałasia «kitajskaja dziaŭčyna». Adnak surazmoŭca śćviardžaŭ, što prablema nie ŭ tekście.

«Kali vykładzieš takoje ŭ azijackim dadatku, ciabie abaviazkova buduć łajać. Nie durej. Lubyja dziejańni, jakija vyśmiejvajuć abo imitujuć vuzki razrez vačej, ličacca dyskryminacyjaj suprać azijataŭ», — patłumačyli joj.

Kamientary da artykuła