U Biełarusi nijak nie mohuć pakazać suśvietny chit — daviałosia viartać hrošy za kvitki
Kamiedyja «Vielmi strašnaje kino 6» (Scary Movie 6) vyjšła na ekrany ŭ pačatku červienia, film z ruskaj ahučkaj pakazali ŭžo ŭ Rasii i Kazachstanie. A voś biełarusy mohuć hety chit i nie pabačyć.
Kadr ź filma. Fota: Entertainment Weekly
«Vielmi strašnaje kino 6» — čarhovaja častka vialikaj kinafranšyzy, jakaja pačałasia jašče ŭ 2000‑m. Kožny z hetych filmaŭ — heta parodyja na viadomyja chorary i adnačasova satyra na skandały, padziei i prosta miemy apošnich hadoŭ.
Niezrazumieła, što z hetaha zasmuciła biełaruskija ŭłady, ale šostaja častka sieryi ŭsio nijak nie moža vyjści ŭ našych kinateatrach.
Suśvietnaja premjera «Vielmi strašnaha kino 6» adbyłasia 5 červienia 2026 hoda, 18 červienia film vyjšaŭ u Rasii. Kino nie tolki akupiłasia, jano pakazała zbory na ŭzroŭni kasavaha chita — 200 miljonaŭ dalaraŭ pry 30 miljonach dalaraŭ, vydatkavanych na zdymki. Vodhuki krytykaŭ, praŭda, niehatyŭnyja, ale ž pry takich zborach naŭrad ci heta zasmucić pradziusaraŭ.
U Biełarusi płanavali pakazać film jašče na minułym tydni — naprykład, sietka kinateatraŭ Mooon płanavała premjeru na 20 červienia. Ale ž 19 červienia ŭ sacsietkach kinateatraŭ napisali, što premjera pieranosicca «z pryčyn, jakija nie zaležać ad Mooon». Hledačam, jakija ŭžo nabyli kvitki, prapanavali viarnuć za ich hrošy.
U inšych kinateatrach situacyja nie lepšaja. Na sajtach pa prodažy kvitkoŭ stajać farmalnyja abjavy pra sieansy 22 červienia, ale ž kvitki na ich vy nie nabudziecie — na sajcie budzie napisana niešta nakštałt «padziej pa vašym zapycie nie znojdziena» abo «prodaž na hetaje mierapryjemstva skončany». Časam možna nabyć kvitki na inšyja dni, ale ž nieviadoma, ci nie daviadziecca viartać i ich.
U kinateatrach tłumačać, što čakajuć adkazu ad Ministerstva kultury, bo stužku jašče nie dadali ŭ rejestr dazvolenaha kino.