Cichanoŭskaja zaklikała Kałas zakryć ščyliny ŭ sankcyjach suprać Łukašenki
Učora Śviatłana Cichanoŭskaja sustrełasia z kiraŭnicaj jeŭrapiejskaj dypłamatyi ŭ štab-kvatery Jeŭrapiejskaj słužby źniešnich dziejańniaŭ u Brusieli.
Fota: pres-słužba Śviatłany Cichanoŭskaj
Padčas sustrečy byli abmierkavanyja niekalki pytańniaŭ, paviedamlaje pres-słužba demakratyčnaj lidarki Biełarusi.
U pryvatnaści, było abmierkavanaje vyzvaleńnie palitviaźniaŭ i kantakty z ZŠA pa humanitarnym treku; vyniki niadaŭniaha vizitu Cichanoŭskaj va Ukrainu i raźvićcio supracoŭnictva z ukrainskim bokam; uzmacnieńnie sankcyj suprać režymu Łukašenki i zakryćcio ščylin u sankcyjnym režymie.
Taksama była abmkierkavanaja padtrymka niezaležnych miedyj, pravaabaroncaŭ, hramadzianskaj supolnaści i demakratyčnych instytutaŭ; zachavańnie mabilnaści biełarusaŭ i vydačy šenhienskich viz; situacyja ź biaśpiekaj u rehijonie i supraćdziejańnie rasijskaj dezinfarmacyi.
Cichanoŭskaja pieradała Kai Kałas šerah analityčnych dakumientaŭ i raskazała pra ŭdzieł biełaruskaj hramadzianskaj supolnaści ŭ abaronie vybaraŭ u Armienii i Małdovie ad rasijskaha ŭpłyvu, mahčymaści nacyjanalnaha dyjałohu jak adnaho ź instrumientaŭ mirnaha vychadu z kryzisu.
Demakratyčnaja lidarka padkreśliła, što vyzvaleńnie ŭsich palitviaźniaŭ, poŭnaja amnistyja i spynieńnie represij pavinny stać pieršymi krokami da nacyjanalnaha dyjałohu i vyrašeńnia kryzisu ŭ Biełarusi.