Zakryvajecca papularnaja minskaja piakarnia LJoN
Uładalnica viadomaj kraftavaj minskaj piakarni LJoN paviedamiła, što jany vymušanyja buduć zakrycca i raspradać abstalavańnie.
Pryčyna — skasavanaja ŭ adnabakovym paradku damova arendy pamiaškańnia na Rakaŭskaj 25/1, dzie znachodziłasia kaviarnia i vytvorčaść (piakarnia pastaŭlała vypiečku i ŭ inšyja miescy).
«Ujavić, što kaliści nam daviadziecca napisać padobnaje, my nie mahli. Z našaj kampanijaj u adnabakovym paradku skasavanaja damova arendy, i my vymušanyja ŭ maksimalnaje karotkija terminy pakinuć pamiaškańnie i spynić pracu.
My piać miesiacaŭ u sudzie zmahalisia za svajo prava praciahvać pracu ŭ hetym miescy, bo mienavita tut znachodzicca nie tolki naša kaviarnia, ale i vytvorčaść i skasavańnie damovy pa fakcie aznačaje stratu kampanii. Na žal, učora my prajhrali apielacyjny sud», — raskazała ŭ instahramie ŭładalnica LJoN Alena Kazłoŭskaja.
Alena Kazłoŭskaja. Fota: instahram @lenbakery
«My pryniali rašeńnie, što dalejšaje zmahańnie nie adpaviadaje tym metam, dziela jakich stvaraŭsia hety prajekt. My budziem pracavać da 21 červienia ŭklučna i čakajem kožnaha z vas u hości. Dapamahčy vy možacie, kali paviedamicie tym, kamu heta moža być cikava, pra prodaž abstalavańnia».
Alena Kazłoŭskaja na ŭvachodzie va ŭłasnuju piakarniu. Fota: instahram @lenbakery
U krasaviku piakarnia na Rakaŭskaj adśviatkavała svajo piacihodździe, za hety čas jana stała papularnym miescam nie tolki ŭ minčukoŭ, jakija jechali siudy pa śviežuju vypiečku navat ź inšaha kanca horada, ale i ŭ turystaŭ. Tut možna było sytna paśniedać i pakaštavać samyja roznyja desierty — ad partuhalskich paštejšaŭ da italjanskich panietone i francuzskich kruasanaŭ ci kišaŭ. Vypiakali ŭ LJoN taksama ŭłasny chleb.
Stałyja naviedvalniki «Lonu» dahetul nie vierać u drennyja naviny i prosiać adkrycca ŭ lubym inšym miescy.
«Ja nie mahu ŭjavić Minsk biez «Lonu». Dla mianie heta miesca jak duša horada»; «Vaša piakarnia stała dla nas druhim domam, u vas było vielmi ciopła i ŭtulna», — množacca kamientary pad pastom pra zakryćcio.
Ale na dadzieny momant uładalniki kaviarni nie bačać dla siabie metazhodnym pieranosić biznes u inšuju łakacyju.