Biełarusy ŭ Threads dapamahali «Siarhieju» ź pierałomam nahi. Ale akazałasia, što heta ašukaniec

Žychar vioski Una Loźnienskaha rajona paśla pierałomu nahi nibyta zastaŭsia biez srodkaŭ da isnavańnia i paprasiŭ dapamohi ŭ Threads. Ale heta historyja była vydumanaj, paviedamiła staršynia Loźnienskaha sielsavieta Śviatłana Pukava. Žurnalistka «Jeŭraradyjo» patelefanavała čynoŭnicy, nazvaŭšysia biełaruskaj, jakaja chacieła dapamahčy. 

Zdymak ilustracyjny. Fota: magnific.com

Pačałosia ŭsio z taho, što karystalnik Threads pad nikam @sergo.sergo1 apublikavaŭ post, u jakim śćviardžaŭ, što žyvie ŭ vioscy Una, pracuje ŭ miascovaj kramie i paśla pierałomu nahi apynuŭsia ŭ ciažkim finansavym stanoviščy. Jon raskazvaŭ, što ź ciažkaściu moža prakarmić dziaciej, a taksama prasiŭ dapamahčy z pošukam padpracoŭki.

Historyja vyklikała vialiki vodhuk siarod karystalnikaŭ sacsietki. Nieŭzabavie «Siarhiej» napisaŭ, što da jaho dadomu pryjazdžali nieznajomyja ludzi z praduktami, sałodkim, cackami i školnymi pryładami dla dziaciej.

Praź niejki čas jon padzialiŭsia numaram svajoj kartki. Niekatoryja karystalniki Threads pieravodzili jamu hrošy, a inšyja byli ŭ zachapleńni ad taho, jak biełarusy hatovyja padtrymlivać adno adnaho.

Adnak paźniej u častki aŭdytoryi ŭźnikli sumnievy ŭ praŭdzivaści hetaj historyi, u tym liku adnosna taho, što niechta sapraŭdy naviedvaŭ «Siarhieja». Pavodle słoŭ adnoj z karystalnic sacsietki, jaje kamientaryj z udakładnialnymi pytańniami byŭ schavany, a nieŭzabavie paśla hetaha staronka mužčyny ŭvohule źnikła z sacyjalnaj sietki.

Śviatłana Pukava, staršynia Loźnienskaha sielsavieta, da jakoha adnosicca vioska Una, u razmovie z žurnalistkaj «Jeŭraradyjo» adnaznačna śćviardžaje, što heta historyja — machlarskaja mistyfikacyja.

— U nas va Unie takich ludziej niama, — kaža surazmoŭca. — Pa adrasie, jaki paznačyŭ hety «Siarhiej», žyvuć zusim inšyja ludzi — padžyłyja dačniki, ale jany žyvuć u nas pastajanna. Ja im patelefanavała. Jany sami ŭ šoku.

Ja kažu: «Moža, heta niejki vaš svajak?» Adkazali: «Nie, navat blizka nie».

Dy i sama ja viosku dobra viedaju. Niama tam takich ludziej, i dziaciej tam, va Unie, taksama niama.

— Što budziecie rabić? Na hetuju historyju ŭ sacsietkach užo adreahavała šmat ludziej, niechta pieravioŭ hrošy.

— My paviedamili ŭ rajvykankam. U adździele ideałohii buduć rychtavać niejki kamientar.

U Loźnienskim rajvykankamie paćvierdzili, što «Siarhiej» — ašukaniec, i paabiacali razabracca z hetaj historyjaj.

Kamientary da artykuła