Niamiecki hienierał raskazaŭ, kudy NATA budzie najpierš bić pa Rasii ŭ vypadku kanfliktu

Kamandujučy Vajskova-pavietranymi siłami Hiermanii Cholhier Nojman u intervju brytanskaj haziecie The Telegraph zajaviŭ, što ŭ vypadku ŭzbrojenaha kanfliktu pamiž NATA i Rasijaj aljans moža nanieści ŭdary pa šerahu stratehičnych abjektaŭ na terytoryi Rasii.

Zdymak ilustracyjny. Fota: Hesham Elsherif/Getty Images

Siarod mahčymych celaŭ niamiecki ministr nazvaŭ Kalininhradskuju vobłaść, Kolski paŭvostraŭ, Sankt-Pieciarburh i akvatoryju Čornaha mora, dzie znachodziacca bazy Čarnamorskaha fłotu Rasii.

Pa słovach hienierała, NATA budzie abaraniać kožnuju dziaržavu — člena aljansu biez vyklučeńnia. Jon adznačyŭ, što mahčymy napad na Estoniju atrymaŭ by taki ž samy adkaz, jak i ataka na Vialikabrytaniju, bo ŭ miežach błoka niama padziełu na bolš ci mienš važnyja zony biaśpieki.

Nojman taksama zajaviŭ, što niamieckija Vajskova-pavietranyja siły praciahvajuć paskoranuju madernizacyju i, pavodle jaho słoŭ, hatovyja da vykanańnia bajavych zadač u vypadku atrymańnia adpaviednaha zahadu.

Vykazvańni niamieckaha hienierała ŭsprymajucca naziralnikami jak adlustravańnie bolš žorstkaj palityki Hiermanii ŭ śfiery abarony i pieraŭzbrajeńnia paśla pačatku vajny Rasii suprać Ukrainy. Kiraŭnictva Hiermanii zajaŭlaje pra namier uzmacnić svajo vojska i pavialičyć jaho mahčymaści ŭ miežach NATA.

Kamientary da artykuła