Cichanoŭskaja: Tyja, chto zajaŭlaje pra prychilnaść «duchoŭnym kaštoŭnaściam», prynosiać u śviatyja miescy rakiety i ahoń
Lidarka demakratyčnych sił Biełarusi asudziła načny ŭdar Rasii pa Kijevie, u vyniku jakoha hareła Kijeva-Piačerskaja łaŭra.
«Siońnia ŭ vyniku varvarskaj ataki Rasii na Ukrainu zahinuli i atrymali ranieńni šmatlikija mirnyja žychary, a taksama była padpalena Kijeva-Piačerskaja łaŭra — adno z samych śviatych miescaŭ našaj ahulnaj historyi.
Łaŭra — heta nie prosta kamiani i ścieny. Heta pamiać, viera, kultura i kałyska chryścijanstva ŭ našym rehijonie, miesca, dzie zaradziłasia duchoŭnaja tradycyja, jakaja abjadnoŭvaje ŭkraincaŭ i biełarusaŭ na praciahu stahodździaŭ. Tyja, chto zajaŭlaje pra prychilnaść «duchoŭnym kaštoŭnaściam», prynosiać u śviatyja miescy rakiety i ahoń. Heta sapraŭdnaje abličča impieryi.
Biełarusy salidarnyja z Ukrainaj, z usimi paciarpiełymi i z usimi, chto abaraniaje prava našych narodaŭ na svaju historyju i budučyniu», — napisała jana ŭ X.