Zarobak biełaruskich miedykaŭ istotna adstaje ad jeŭrapiejskich susiedziaŭ

Choć zarobki biełaruskich miedykaŭ mocna vyraśli za apošnija hady, daktary ŭ Polščy, Litvie i Hiermanii ŭsio jašče atrymlivajuć u niekalki razoŭ bolš za biełaruskich kaleh. A biełaruskija miedsiostry ŭvohule atrymlivajuć navat mienš za siaredni zarobak pa krainie.

Aŭtary niezaležnaha ahladu biełaruskaj sistemy achovy zdaroŭja, padrychtavanaha pry padtrymcy BYMEDSOL i prajekta «Biełyja chałaty», padličyli, jak vyhladajuć zarobki biełaruskich miedykaŭ na fonie susiednich krain.

Pa ich padlikach, u 2025 hodzie siaredni naličany zarobak doktara dasiahnuŭ 4000 rubloŭ, abo prykładna $1200 na miesiac. Heta značna bolš, čym niekalki hadoŭ tamu, adnak u mižnarodnym paraŭnańni biełaruskija miedyki ŭsio jašče zastajucca siarod najmienš apłatnych u rehijonie.

Pavodle acenak daśledčykaŭ, u Rasii daktary letaś atrymlivali ŭ siarednim u paŭtara raza bolš. U krainach Bałtyi zarobki byli ŭ dva-try razy vyšejšyja za biełaruskija, a ŭ Polščy i Hiermanii razryŭ jašče bolšy.

Naprykład, u Łatvii daktary majuć 2000‑3500 jeŭra ŭ miesiac čystymi, u Litvie — ad 2500 da 4000 jeŭra, u Polščy — ad 3000 da 5550 (heta prykładna ad 9500 da 17000 biełaruskich rubloŭ čystymi ŭ pieravodzie). U Hiermanii zarobki časam pieravyšali 8 tysiač jeŭra, pry hetym małady doktar paśla ŭniviersiteta moh raźličvać na 5 tysiač jeŭra za miesiac biez uliku dapłat za načnyja dziažurstvy i zvyšuročnuju pracu.

Uzrovień zarobkaŭ daktaroŭ pa krainach adnosna Biełarusi. Krynica: materyjały ahladu

Nie mienš prykmietny razryŭ nazirajecca i ŭ zarobkach siaredniaha miedycynskaha piersanału. U Biełarusi ŭ 2025 hodzie siaredni zarobak miedsiaścior i fielčaraŭ składaŭ kala 2075 rubloŭ, abo prykładna 625 dalaraŭ u miesiac.

U Rasii siaredni miedycynski piersanał atrymlivaŭ 600—800 jeŭra ŭ miesiac, što na tracinu bolš za biełaruski ŭzrovień. U krainach Jeŭrasajuza roźnica značna bolšaja: u Łatvii miedsiostry letaś zarablali 1200—2000 jeŭra za miesiac, u Litvie — 1500—2500 jeŭra, u Polščy — 1800—3000 jeŭra, a ŭ Hiermanii — 2800—4000 jeŭra.

Uzrovień zarobkaŭ siaredniaha miedycynskaha piersanału pa krainach adnosna Biełarusi. Krynica: materyjały ahladu

Pry hetym, jak adznačajuć aŭtary ahladu, prablema nie tolki ŭ adstavańni ad susiednich krain. Pavodle danych Ministerstva achovy zdaroŭja, siaredni miedycynski piersanał u Biełarusi atrymlivaje tolki kala 76% ad siaredniaha zarobku pa krainie, što stvaraje pastajanny stymuł da sychodu z prafiesii abo pošuku dadatkovaha zarobku.

Pavodle aŭtaraŭ ahladu, mienavita razryŭ u apłacie pracy z susiednimi krainami zastajecca adnym z faktaraŭ adtoku miedycynskich kadraŭ. Kali da 2020 hoda mnohija biełaruskija daktary vyjazdžali pieravažna ŭ Rasiju, to paśla 2020‑ha ŭsio bolš miedykaŭ vybirajuć krainy Jeŭrasajuza.

Asabliva vostra deficyt kadraŭ adčuvajecca ŭ aniestezijałohii i reanimatałohii, chirurhii, radyjałohii, pieršasnym źvianie i siastrynskaj dapamozie. Dla pacyjentaŭ heta aznačaje bolšuju nahruzku na adnaho śpiecyjalista, mienš času na pryjom i bolš vysokuju ryzyku prafiesijnaha vyharańnia miedykaŭ.

Ułady sprabujuć kampiensavać niedachop kadraŭ praz raźmierkavańnie vypusknikoŭ, metavuju padrychtoŭku, sumiaščalnictva i pryciahnieńnie piensijanieraŭ. Paśla admieny abmiežavańniaŭ na vypłatu piensij pracujučym piensijanieram kolkaść rabotnikaŭ piensijnych hadoŭ u achovie zdaroŭja ŭ 2025 hodzie vyrasła amal na 11%.

Adnak aŭtary ahladu adznačajuć, što takija miery dazvalajuć zakryć častku vakansij, ale nie vyrašajuć prablemy abnaŭleńnia kadraŭ i nie likvidujuć hałoŭnaj pryčyny adtoku kadraŭ — razryvu ŭ zarobkach z susiednimi krainami, a taksama palityčnaj niesvabody i biezzakońnia ŭ krainie.

Kamientary da artykuła