Na Sardzinii zabaranili prychodzić na plaž z parasonami. Čamu tak?

Na italjanskim vostravie Sardzinija miascovyja ŭłady ŭviali novyja strohija praviły naviedvańnia adnaho z samych papularnych plažaŭ — Punta-Malencis. Adpačyvalnikam va ŭzroście ad 10 da 65 hadoŭ zabaranili prynosić na plaž i ŭstaloŭvać parasony, altanki, namioty i inšyja kanstrukcyi dla stvareńnia cieniu, paviedamlaje The Guardian.

Zdymak ilustracyjny. Fota: magnific.com

Vyklučeńnie zrabili tolki dla siemjaŭ ź dziećmi da 10 hadoŭ i ludziej starejšych za 65 hadoŭ — im dazvolena karystacca adnym vialikim parasonam. Novyja abmiežavańni buduć dziejničać da kanca kastryčnika.

Ułady tłumačać takoje rašeńnie kłopatam pra biaśpieku ludziej i zachavańnie pryrody. U minułym hodzie ŭ hetym rajonie adbylisia maštabnyja lasnyja pažary, jakija źniščyli častku plažu, dziuny i aŭtastajanku. Niekatorym adpačyvalnikam tady navat daviałosia ratavacca ad ahniu na łodkach. Vialikaja ž kolkaść parasonaŭ na pierapoŭnienym plažy pieraškadžała chutkaj evakuacyi.

Akramia zabarony na parasony, na Punta-Malencis uviali i inšyja abmiežavańni. Za ŭvachod na plaž ciapier treba płacić 10 jeŭra, i tolki ludzi ź invalidnaściu dy asoby, što ich supravadžajuć, mohuć naviedvać jaho biaspłatna. Kolkaść aŭtamabilaŭ abmiežavali da 70 u dzień, a dla adpačynku nieabchodna zahadzia zabraniravać miesca. Adnačasova na plažy mohuć znachodzicca nie bolš za 150 čałaviek.

Novyja praviły vyklikali niezadavolenaść u mnohich turystaŭ. U sacyjalnych sietkach i kamientaryjach ludzi žartavali, što paśla dnia bieź cieniu možna trapić u balnicu z soniečnymi apiokami, a niekatoryja sarkastyčna adznačyli, što aŭtary zabarony nibyta sami «pierahreli sabie hałovy».

Na Sardzinii ŭžo isnujuć i inšyja niezvyčajnyja praviły dla turystaŭ. Naprykład, zabaroniena zabirać ź plažaŭ piasok, a ŭ niekatorych prybiarežnych miaścinach dziejničajuć dadatkovyja miery dla abarony pryrody i abmiežavańnia kolkaści naviedvalnikaŭ.

Kamientary da artykuła