«15 chvilin i kaštuje 100 rubloŭ». Biełarusy spračajucca pra canu spatkańnia z kapibaraj u parku žyvioł pad Baranavičami

Historyja pra płatnuju sustreču z kapibaraj u «Parku žyvioł» pad Baranavičami vyklikała abmierkavańnie ŭ Threads. Naviedvalnica zajaviła, što za mahčymaść 15 chvilin pakamunikavać z žyviolinaj treba zapłacić 100 rubloŭ dadatkova da ŭvachodnych kvitkoŭ, i zasumniavałasia, ci apraŭdanaja takaja cana. U kamientaryjach razharnułasia dyskusija — adnyja ličać pasłuhu darahoj, inšyja ŭpeŭnienyja, što heta narmalnaja praktyka i hrošy iduć na ŭtrymańnie žyvioł, piša BG.Media.

Kapibara ŭ parku žyvioł pad Baranavičami. Fota z Threads

Naviedvalnica raskazała pra płatnuju pasłuhu — i atrymała sotni kamientaryjaŭ pra toje, kolki pavinna kaštavać sustreča z žyviołaj.

Biełaruska była ździŭlena, što «spatkańnie» z kapibaraj kaštuje 100 rubloŭ

Biełaruska pryjechała ŭ «Park žyvioł» (viadomy jak «Dypryz») u Baranavickim rajonie ź dziećmi, kab ubačyć kapibar, adnak sutyknułasia z dadatkovaj płatnaj pasłuhaj — «spatkańniem z kapibaraj».

Pa słovach žančyny, uvachodnyja bilety dla adnaho darosłaha i dvuch dziaciej abyšlisia ŭ 105 rubloŭ, jašče 15 rubloŭ pajšło na korm dla žyvioł. Ale, jak jana śćviardžaje, asnoŭnaje rasčaravańnie čakała dalej: za mahčymaść pakamunikavać z kapibaraj bližej — pahładzić i zrabić fota — treba dapłacić jašče 100 rubloŭ za 15 chvilin.

«Ja na heta nie raźličvała. Na moj pohlad, heta taho nie varta. Jak vy ličycie?» — napisała jana ŭ Threads.

Post za dva dni sabraŭ bolš za 100 tysiač prahladaŭ i kala 300 kamientaryjaŭ.

U kamientaryjach adkazaŭ i sam «Park žyvioł» u Baranavickim rajonie. U administracyi patłumačyli, što kapibara znachodzicca ŭ zvyčajnym valjery na pieršaj łakacyi parka i dastupnaja dla ŭsich naviedvalnikaŭ:

«Kapibara žyvie ŭ valjery na pieršaj łakacyi Parku. Kali vy byli ŭ nas niadaŭna, to mahli zaŭvažyć kala jaje valjera vialikuju roznakalarovuju kapibaru. Na terytoryi Parku niama pustych valjeraŭ: kali na valjery paznačanaja žyvioła, značyć jana tam žyvie. Prosta časam našy žychary adpačyvajuć u domiku abo vybirajuć samy ŭtulny kutok dla snu».

Asobna ŭ parku ŭdakładnili, što płatnaja pasłuha «Spatkańnie z kapibaraj» — heta farmat asabistaha kantaktu z kankretnaj žyviolinaj pa imieni Kapi:

«Jana vielmi lubić ludziej, uvahu i, kaniečnie ž, smačna pajeści».

«Doraha ci narmalna?» — mierkavańni biełarusaŭ padzialilisia

U kamientaryjach da historyi razharnułasia dyskusija: adnyja ličać canu zavyšanaj, inšyja — apraŭdanaj z punktu hledžańnia kłopatu pra žyvioł i popytu na pasłuhu.

«Doraha. Ale ŭjavicie, kali pasłuha budzie kaštavać 20 rubloŭ — jak zmučycca žyvioła za dzień ad takich spatkańniaŭ. Chaj lepš 5 spatkańniaŭ pa 100, čym 25 pa 20», — napisaŭ adzin z karystalnikaŭ.

«Hetyja hrošy iduć na absłuhoŭvańnie žyvioł. Park sapraŭdy tracić ich mienavita na žyvioł. Žyvioły čystyja, dahledžanyja, i ja nie škaduju ni kapiejki», — adznačyła inšaja naviedvalnica.

Častka kamientataraŭ raskazała, što pasłuha karystajecca popytam i patrabuje papiaredniaha zapisu za niekalki tydniaŭ.

«Byli my na spatkańni z Kapi. Svaich hrošaj kaštuje», — koratka napisaŭ adzin z karystalnikaŭ.

Pry hetym hučała i krytyka:

«Nam nie spadabaŭsia hety park, usie źviary adnastajnyja, ceny kaśmičnyja. Jość bolš pryjemnyja parki i zaaparki dla naviedvańnia».

Inšyja ž adznačyli, što kapibaru možna ŭbačyć i biaspłatna, kali prosta naviedać adpaviednuju zonu, a płatnaja pasłuha — tolki pašyrany farmat uzajemadziejańnia.

Kamientary da artykuła