Pad Minskam naładzili zborku Citroen. Stali viadomyja madeli i ceny
Aŭtamabili francuzskaha brenda buduć źbirać na zavodzie «Junison» u Abčaku.
Francuzy z kitajskim akcentam
Na zavodzie pad Minskam źbirajuć adrazu try madeli, i ŭsie jany — krasoviery.
Samym dastupnym «francuzam» biełaruskaj zborki źjaŭlajecca Citroen C3-XR. Ceny na kampaktny krasovier pačynajucca z 75 tysiač rubloŭ, što kala $26600 pa ciapierašnim kursie.
Treba razumieć, što Citroen C 3‑XR — heta nie toje samaje, što Citroën C3, jaki pradajuć u Jeŭropie. Citroen C 3‑XR — heta tvareńnie franka-kitajskaha sumiesnaha pradpryjemstva Dongfeng Peugeot-Citroen.
Bieły aŭtamabil — Citroen C 3‑XR. Fota: av.by
Tamu ŭ Jeŭrasajuzie takuju madel nie znojdzieš. Da Biełarusi jaje źbirali tolki ŭ Kitai i Iranie.
Novy stary Citroen
Nastupnym pa pamiery i darahaviźnie idzie Citroen C5 Aircross. Ceny na jaho pačynajucca z 95 tysiač rubloŭ, ci kala $33700.
I hetaja madel užo maje našmat bolš ahulnaha z sapraŭdnym Citroen, bo heta taki samy Citroen C5 Aircross, jak i ŭ Jeŭrasajuzie. Adzinaje važnaje adroźnieńnie ŭ tym, što ŭ Biełarusi naładzili zborku papiaredniaha pakaleńnia Citroen C5 Aircross.
U Jeŭropie ž u 2025 hodzie vyjšła druhoje pakaleńnie C5 Aircross.
Źvierchu — Citroen C5 Aircross papiaredniaha pakaleńnia, jaki pačali źbirać u Biełarusi. Unizie — Citroen C5 Aircross novaha pakaleńnia, jaki pačali vypuskać u Jeŭrasajuzie z 2025 hoda. Fota: skrynšoty z sajtaŭ citroen-center.by i citroen-vilnius.lt
Ahulnaja madel
Što da samaj darahoj madeli ŭ liniejcy biełaruskaj zborki — C5X, to kitajskaja i jeŭrapiejskaja madeli adnolkavyja, bo navat mašyny, jakija pradajucca ŭ Jeŭropie, majuć kitajskuju zborku.
Fota: skrynšot z sajta citroen-center.by
Ceny na C5X, sabranyja ŭ Biełarusi, buduć pačynacca z 96 tysiač rubloŭ, ci z kala $32 tysiač.
Zborka aŭtamabilaŭ u Biełarusi dazvalaje častkova ekanomić na ŭtylizacyjnym zbory, a taksama pretendavać na lhotnyja ŭmovy lizinhu i kredytavańnia.
Pakul u Biełarusi sabrali ŭsiaho 48 Citroen, jakija ŭžo pastupili ŭ prodaž. Prynamsi pakul u Biełarusi buduć źbirać tolki aŭto ź bienzinavym ruchavikom. Usie mašyny sabranyja z mašynakamplektaŭ, jakija nabyvajuć u Kitai ŭ kampanii Dongfeng Peugeot Citroen Automobile Company LTD. Pry hetym kala traciny kampanientaŭ u hetych aŭto — jeŭrapiejskaj vytvorčaści.