Miljony na «pravilnych» apytańniach. Jak žonka hałoŭnaha prydvornaha sacyjołaha Kramla kupajecca ŭ raskošy

FBK znajšoŭ u siamji kiraŭnika VCIOM nieruchomaść, aŭtamabili i pradmiety raskošy na miljony dalaraŭ. Valeryj Fiodaraŭ bolš za 20 hadoŭ uznačalvaje dziaržaŭnuju słužbu, jakaja manipuluje hramadskaj dumkaj rasijan. A jaho žonka skuplaje elitnuju nieruchomaść, luksavy aŭtapark, kalekcyi brendavych sumak i kaštoŭnaściej.

Fond baraćby z karupcyjaj vyjaviŭ u siamji dyrektara Usierasijskaha centra vyvučeńnia hramadskaj dumki (VCIOM) Valeryja Fiodarava nieruchomaść, aŭtamabili i pradmiety raskošy na sumu bolš za 500 miljonaŭ rasijskich rubloŭ (7 młn dalaraŭ), pierakazvaje «Mieduza».

Aŭtary rasśledavańnia pryjšli da takoj vysnovy, vyvučyŭšy finansavyja dakumienty, dadzienyja ŭciečak, a taksama instahram 30‑hadovaj Darji Vasiljevaj — druhoj žonki kiraŭnika sacyjałahičnaj słužby.

Fiodaraŭ uznačalvaje VCIOM z 2003 hoda. VCIOM — dziaržaŭny sacyjałahičny centr, jaki ŭ liku inšaha publikuje daśledavańni pra davier rasijan dziejučaj uładzie. Niezaležnyja ŚMI nieadnarazova pisali pra toje, jak centr z dapamohaj takich publikacyj manipuluje hramadskaj dumkaj. Faktyčna VCIOM farmuje ŭjaŭleńnie pra toje, što «bolšaść» rasijan padtrymlivaje Uładzimira Pucina i jaho palityčnyja rašeńni.

Adzin z apošnich prykładaŭ — rejtynh adabreńnia dziejnaści Pucina, jaki padaje z kanca sakavika na fonie adklučeńniaŭ u Rasii mabilnaha internetu, błakirovak telehrama i rostu koštaŭ na pradukty.

Na fonie źnižeńnia rejtynhu centr źmianiŭ mietodyku apytańniaŭ i staŭ pravodzić nie tolki telefonnyja intervju, ale i pakvaternyja apytańni — to-bok pytacca ŭ ludziej asabista. Ale heta nie dapamahło. Pavodle dadzienych apytańnia, apublikavanaha 29 maja, pracu Pucina na pasadzie prezidenta adabrajuć 67,5% respandentaŭ. Heta na 1,9 pracentnaha punkta nižej u paraŭnańni z vynikami, apublikavanymi tydniem raniej.

Žonka Fiodarava da niedaŭniaha času viała błoh u instahramie, raspaviadajučy pra svajo śvieckaje žyćcio i padarožžy za miažu.

Tak, jany z kiraŭnikom VCIOM jeździli ŭ Francyju, Italiju, Hiermaniju i Azierbajdžan jašče ŭ 2018 hodzie. Na toj momant Fiodaraŭ byŭ u pieršym šlubie. Paźniej jon raźvioŭsia i ŭ 2021‑m raśpisaŭsia z Vasiljevaj. U ich jość ahulnaje dzicia.

U svaim instahramie žonka Fiodarava, siarod inšaha, publikavała fota i videa darahich mašyn i inšych pradmietaŭ raskošy. Jak ustanavili ŭ FBK, Vasiljevaj naležać:

* aŭtamabil Porsche Cayenne za 175 tysiač dalaraŭ,

* miniven Zeekr za 125 tysiač dalaraŭ,

* kalekcyja sumak Hermès (jak minimum 24 štuki) prykładna 740 tysiač dalaraŭ,

* kalekcyja ŭpryhožvańniaŭ Cartier i Bulgari na 265 tysiač dalaraŭ.

Akramia taho, Vasiljeva vałodaje kvateraj płoščaj 170 kvadratnych mietrov u maskoŭskim ŽK «Smalenski De Luxe» i čatyrma mašyna-miescami ahulnym koštam kala 3 miljonaŭ dalaraŭ.

Siamja Fiodarava taksama inviestavała ŭ nieruchomaść u maskoŭskich žyłych kompleksach «Łužniki Collection» i Slava Residences. Hetyja ŽK jašče budujucca, tamu nieviadoma, jakija dakładna kvatery kupili Fiodaravy. Aŭtary rasśledavańnia acanili 75‑mietrovyja kvatery tam prykładna ŭ 2,7 miljona dalaraŭ.

Jak adznačaje FBK, surjoznych dachodaŭ u Vasiljevaj niama, a aficyjnyja dachody Fiodarava značna nižejšyja za košt majomaści jaho siamji. 

Aŭtary rasśledavańnia ličać, što Fiodaraŭ «abahačajecca na absłuhoŭvańni intaresaŭ ułady» i «pravodzić machinacyi z padradčykami» na biudžetnyja srodki, jakija dziaržava vydzialaje VCIOM na sacyjałahičnyja daśledavańni.

Jak ustanavili ŭ FBK, struktury sacyjałahičnaha centra pieraličyli sotni miljonaŭ rubloŭ sietcy indyvidualnych pradprymalnikaŭ. Pry hetym mnohija ź ich, śćviardžajecca ŭ rasśledavańni, uvohule nijak nie źviazany z sacyjałohijaj. Siarod atrymalnikaŭ vypłataŭ — fatohraf, jaki ciapier kiruje akvaparkam, piensijanier, supracoŭniki turahienctvaŭ i aŭtasałonaŭ.

Kamientary da artykuła