Rasija, Biełaruś, Kazachstan i Kyrhyzstan zapatrabavali ad Armienii pravieści refierendum i vybrać pamiž Jeŭrapiejskim i Jeŭrazijskim sajuzami

U sumiesnaj zajavie Uładzimira Pucina, Alaksandra Łukašenki, Kasyma-Žamarta Takajeva i Sadyra Žaparava havorycca, što padrychtoŭka Jerevana da ŭstupleńnia ŭ ES niasie «istotnyja ryzyki dla ekanamičnaj biaśpieki» krain JEAES.

Fota Contributor / Getty Images

Ułady Rasija, Biełaruś, Kazachstan i Kyrhyzstan 29 maja zapatrabavali ad Armienii pravieści refierendum i vyrašyć pytańnie, ci zastajecca kraina ŭ składzie Jeŭrazijskaha ekanamičnaha sajuza, abo praciahvaje imknucca da ŭstupleńnia ŭ Jeŭrapiejski sajuz, piša «Mieduza».

U sumiesnaj zajavie Uładzimira Pucina, Alaksandra Łukašenki, Kasyma-Žamarta Takajeva i Sadyra Žaparava havorycca, što padrychtoŭka Jerevana da ŭstupleńnia ŭ ES niasie «istotnyja ryzyki dla ekanamičnaj biaśpieki» krain JEAES. Aŭtary zajavy ličać, što nieabchodna «praduchilić źviazanuju z hetym škodu».

«Padzialajem pazicyju ab nieabchodnaści praviadzieńnia ŭ Armienii ŭ jak maha karaciejšyja terminy ahulnanacyjanalnaha refierendumu adnosna ŭstupleńnia ŭ Jeŭrapiejski sajuz abo dalejšaha znachodžańnia ŭ składzie Jeŭrazijskaha ekanamičnaha sajuza».

Premjer-ministr Armienii Nikoł Pašynian raniej nieadnarazova zajaŭlaŭ, što Jerevan, pakul heta mahčyma, budzie praciahvać adnačasova supracoŭničać jak z zachodnimi krainami, tak i ź dziaržavami JEAES. Pavodle jaho słoŭ, jak tolki takoj mahčymaści nie stanie, narod Armienii zrobić svoj vybar.

7 červienia ŭ Armienii projduć parłamienckija vybary. Na hetym fonie adnosiny pamiž Maskvoj i Jerevanam rezka pahoršylisia. Rasija abvinavačvaje dziejnaha premjer-ministra Armienii Nikoła Pašyniana ŭ prazachodnim kursie. Maskva taksama patrabuje dapuścić da vybaraŭ kiraŭnika rasijskaj pramysłova-budaŭničaj hrupy Tašyr, biznesmiena Samvieła Karapieciana. U adkaz na sproby Jerevana zblizicca ź Jeŭrapiejskim sajuzam Rasija pačała ŭvodzić abmiežavańni na impart pradukcyi z Armienii.

Kamientary da artykuła