Syna kiraŭnicy Misii demakratyčnaj Biełarusi va Ukrainie Śviatłany Šacilinaj zatrymali, ale adpuścili
abnoŭlena
Sutnaść padazreńniaŭ u jaho bok pakul niezrazumiełaja.
Mikita Šacilin. Fota: @dtp.kiev.ua
Infarmacyja pra zatrymańnie Mikity Šacilina źjaviłasia va ŭkrainskich ŚMI. Jany napisali, što Mikita Šacilin, načalnik upraŭleńnia pa pytańniach vieteranskaj palityki Irpienskaj haradskoj rady, moh być zatrymany za ŭdzieł u schiemach, źviazanych z dapamohaj va ŭchileńni ad mabilizacyi.
«Pryčyny i abstaviny zatrymańnia ja pakul nie viedaju, bo ŭ mianie nie było mahčymaści źviazacca z synam. Spadziajusia, što chutka budu vałodać bolš poŭnaj infarmacyjaj i my jaje damo», — skazała «Našaj Nivie» Śviatłana Šacilina.
Siamja Śviatłany Šacilinaj. Mikita — pieršy źleva. Fota: siamiejny archiŭ
Mikita Šacilin — vieteran vajny, jon braŭ udzieł u bajavych dziejańniach na baku Ukrainy jašče ŭ 2014 hodzie. Paśla pačatku poŭnamaštabnaj vajny ŭdzielničaŭ u abaronie Irpienia, Baradzianki i Makarava. Uznaharodžany ordenam «Za mužnaść» III stupieni.
Bližej da viečara Mikitu Šacilina vypuścili — jon zapisaŭ videa, na jakim idzie pa vulicy, paćviardžaje svajo zatrymańnie, jakoje adbyłosia 26 maja. I dadaje, što «davać kamientary pa spravie jamu zabaroniena ŭkrainskim zakanadaŭstvam».