Ci chantavirus niebiaśpiečny i ci moža jon stać novym kavidam?

Na kruiznym karabli, jaki płyvie da Kanaraŭ, zdaryłasia ŭspyška virusa, ad jakoha niama lekaŭ. Bolš za toje, ludzi ź simptomami chvaroby jość užo ŭ šaści krainach, i ŭ sacsietkach šyracca abmierkavańni, ci nie novy heta kavid. Zadali hetaje pytańnie doktaru, bijachimiku i malekularnamu bijołahu Śviatłanie Kabanavaj.

Fota: AR

Virus, pra jaki idzie havorka, maje nazvu andes. Heta adzin ź siamiejstva ortachantavirusaŭ, to-bok infiekcyj, jakija zvyčajna pieradajucca ad hryzunoŭ da čałavieka.

Śviatłana tłumačyć, jak heta adbyvajecca:

«Virusnyja čaścinki vyłučajucca ŭ zaražanych hryzunoŭ sa ślinaj, fiekalijami ci mačoj. Zaražeńnie čałavieka moža adbycca, kali jon spažyvaje ježu, što źmiaščaje ekskremienty infikavanych žyviołaŭ, udychaje pył ź ich vydzialeńniami, ci kali takaja žyvioła jaho kusaje».

Andes ujaŭlaje asablivuju niebiaśpieku, bo, jak paviedamlajecca, jon moža pieradavacca i ad čałavieka da čałavieka, a heta palahčaje jaho raspaŭsiud. Ad hetaha virusa niama śpiecyfičnaha lačeńnia abo vakcyn, miedyki mohuć tolki padtrymać arhanizm, pakul jon zmahajecca. Śmiarotnaść ad andesu moža dasiahać 40%.

Adnak andes raspaŭsiudžvajecca zusim nie tak, jak kavid.

«Pašyreńnie kavidu pierarasło ŭ pandemiju, tamu što karanavirus pieradajecca pavietrana-kropielnym čynam ad čałavieka da čałavieka. Schiematyčna heta možna ŭjavić tak: adzin infikavany zaražaje vialikuju kolkaść ludziej u kinateatry, a potym kožny ź ich zaražaje rodnych i kalehaŭ na pracy.

Z kožnym krokam zaražeńniaŭ budzie bolš i bolš, i ŭrešcie ich budzie stolki, što situacyja stanie niepadkantrolnaj. Heta i jość pandemija», — kaža Śviatłana.

U adroźnieńnie ad kavidu, čałaviek, infikavany chantavirusam, zvyčajna nie pieradaje jaho pavietrana-kropielnym čynam. Zaražeńnie ŭ takim vypadku adbyvajecca praz kantakt bijałahičnych vadkaściaŭ — naprykład, kali kroŭ čałavieka ź virusam trapić u ranu zdarovaha čałavieka.

«Imaviernaść takoha zaražeńnia ŭ paraŭnańni z kavidam našmat mienšaja, tamu pieradumoŭ dla ŭźniknieńnia pandemii chantavirusa niama. Tym nie mienš, kali zaražeńnie čałavieka adbyłosia, treba nieadkładna źviarnucca da doktara, tamu što zachvorvańnie moža praciakać ciažka», — raskazvaje navukoŭka.

Što da simptomaŭ zaražeńnia, jany nahadvajuć prykmiety hrypu. Heta pavyšanaja tempieratura, boli ŭ muskułach i sustavach, hałaŭny bol, hałavakružeńnie, młosnaść abo dyjareja.

Śviatłana Kabanava. Fota: archiŭ surazmoŭcy

Kamientary da artykuła