Niamiecki turyst vyjhraŭ sud pra zaniatyja ležaki la basiejna
Turyst z Hiermanii paskardziŭsia ŭ sud na toje, što na adpačynku ŭ Hrecyi nie moh zaharać na ležaku, bo jaho viečna zajmali inšyja turysty, paznačajučy ručnikami, piša Bi-bi-si.
Fota Peter Cade / Getty Images
Hety čałaviek, čyjo imia ŭ presie nie abviaščajecca, adpačyvaŭ ź siamjoj u Hrecyi ŭ 2024 hodzie. Jon štoranicu ŭstavaŭ a šostaj hadzinie, kab zaniać lažak — i ŭsio roŭna ciarpieŭ niaŭdaču.
Za adpačynak u hateli na hreckim vostravie Kos usioj siamjoj — jon, žonka i dvoje dziaciej — jon zapłaciŭ 7186 jeŭra.
Paśla viartańnia jon paskardziŭsia ŭ akruhovy sud Hanoviera na firmu-turapieratara za toje, što jana nie zmahałasia z takoj praktykaj «reziervavańnia» ležakoŭ pry dapamozie ručnikoŭ.
U sudzie jon skazaŭ, što sam hatel zabaraniŭ hetuju praktyku, ale turystyčny apieratar ničoha nie rabiŭ dla taho, kab uvasobić zabaronu ŭ žyćcio, to bok nie patrabavaŭ ad klijentaŭ, kab jany nie paznačali ležaki ručnikami.
U vyniku dzieciam, pa jaho słovach, davodziłasia zaharać na padłozie.
Turapieratar da suda ŭžo vypłaciŭ jamu 350 jeŭra kampiensacyi, ale sud vyrašyŭ, što hetaha mała, i prysudziŭ jamu 986 jeŭra i 70 centaŭ.
Sudździa patłumačyŭ, što, choć turystyčny apieratar i nie vałodaje hetym hatelem i tamu nie moža sam zabiaśpiečyć kožnaha svajho klijenta volnym ležakom, jon usio ž pavinien byŭ pierakanacca, što na kurorcie, kudy jon pradaje tur, adpačynak arhanizavany naležnym čynam, i ŭ tym liku zabiaśpiečanyja «razumnyja» suadnosiny kolkaści ležakoŭ i haściej.
Z prablemaj ležakoŭ ci šezłonhaŭ, pastajanna «zabraniravanych» ručnikami, turysty sutykajucca ŭ mnohich miescach.
Letaś, naprykład, u sacsietkach źjavilisia videa turystaŭ na Kanarskich vyspach, jakija spali ŭ šezłonhach, kab nie zhubić miesca kala basiejna.
Niekatoryja turystyčnyja kampanii sprabujuć zmahacca z hetaj prablemaj. Kampanija Thomas Cook Tourism, naprykład, prapanuje klijentam zahadzia zabraniravać miesca kala basiejna — za dadatkovuju płatu.
U Ispanii ž u niekatorych miescach uviali vialikija štrafy dla turystaŭ, jakija zajmajuć miesca dla zaharańnia ručnikom ci svaimi rečami i zatym nadoŭha źnikajuć.