U Polščy lehalizujuć 8 tysiač biełaruskich traktaroŭ

Jak paviedamlajuć polskija ŚMI, u Jeŭrasajuzie płanujuć urehulavać pravavy status kala 8 tysiač traktaroŭ Minskaha traktarnaha zavoda (MTZ), jakija byli zaviezienyja ŭ Polšču paśla 2016 hoda, piša vydańnie «Biełorusy i rynok».

Zdymak ilustracyjny. Fota: Lookby.media

Prablema zaklučałasia ŭ tym, što hetaja technika nie mieła poŭnaha pakieta jeŭrapiejskich dazvołaŭ i farmalna nie adpaviadała častcy patrabavańniaŭ ES. Z-za hetaha traktary nie mahli paŭnavartasna prachodzić techahlad i lehalna vykarystoŭvacca na darohach ahulnaha karystańnia.

Ciapier Jeŭrakamisija dała zhodu na ŭviadzieńnie śpiecyjalnych pravił, jakija dazvolać urehulavać status hetaj techniki. Polski ŭrad padrychtavaŭ adpaviednyja normy, jakija pavinny być razhledžanyja ŭ mai na ŭzroŭni ŭradavaha kamiteta.

Faktyčna havorka idzie pra «amnistyju» dla hetaj techniki: paśla pravierak traktary zmohuć atrymlivać śpiecyjalnuju adznaku na stancyjach techahladu i aficyjna vykarystoŭvacca fiermierami jak na palach, tak i na darohach ahulnaha karystańnia.

Ułady Polščy padkreślivajuć, što meta rašeńnia — dazvolić fiermieram biaśpiečna i biez abmiežavańniaŭ vykarystoŭvać u sielskahaspadarčaj pracy užo nabytyja mašyny, a nie kuplać novyja.

Kamientary da artykuła