Na Kanfierencyi biełarusaŭ u Varšavie čaćviora čałaviek razharnuli płakaty suprać Cichanoŭskaj. Jana adkazała
Padčas vystupleńnia Śviatłany Cichanoŭskaj na V Kanfierencyi biełarusaŭ i biełarusak śvietu ŭ Varšavie niekalki ŭdzielnikaŭ vyjšli z płakatami z nadpisami «Kanfierencyja ≠ vyniki», «Cichanoŭskaja, dzie mandat?», «Cichanoŭskaja = Łukašenka», «Śvieta, addaj hrošy Sašu, ačyści sumleńnie».
Fota: Reform.news
Napiaredadni apanienty Ofisa Cichanoŭskaj anansavali akcyju suprać, pavodle ich słoŭ, «samazvancaŭ i machlaroŭ, jakija prykryvajucca imiem naroda Biełarusi, niezakonna prysvojvajuć srodki zachodnich donaraŭ, datyčnyja da ŭciečki piersanalnych danych i sadziejničajuć palityčna matyvavanym aryštam». Arhanizatary taksama zajavili, što takija kanfierencyi nie nakiravanyja na vyrašeńnie realnych prablem, a vykarystoŭvajucca dla «asvajeńnia vydzielenaha finansavańnia», piša Reform.news.
Da miesca praviadzieńnia kanfierencyi pryjšoŭ błohier Siarhiej Piatruchin, jaki taksama zaklikaŭ paplečnikaŭ dałučycca da akcyi suprać mierapryjemstva. Jon razharnuŭ płakat «Infaabsłuha demsił — heta nie žurnalistyka. Kamu słužać «niezaležnyja ŚMI?».
Žurnalisty paprasili Śviatłanu Cichanoŭskuju prakamientavać toje, što adbyłosia. Pavodle jaje słoŭ, jana viedała pra padrychtoŭku akcyi.
«Ja bačyła i na samoj spravie viedała, što niedzie ŭ sacsietkach zaklikajuć ludziej pryjści na kanfierencyju i vykazać svajo mierkavańnie. Ale va ŭsich nas jość na heta prava.
Mahčyma, kali pačniecca dyskusija, ja zaprašu hetych ludziej i prosta ź imi pahavaru: u čym sprava, jakija jość pytańni i pasprabuju adkazać. Bo čaściej za ŭsio… Ja spadziajusia, što jany pryjšli z kankretnymi prapanovami, jak niešta možna palepšyć, kali, naprykład, ich nie zadavalniaje maja praca. Treba ŭdakładnić: heta suprać mianie asabista ci suprać kanfierencyi. Ja hetych niuansaŭ nie viedaju. Tak, ja bačyła. Vydatna, što ŭ nas jość takaja mahčymaść», — adkazała palityk.
Fota: Reform.news
Fota: Reform.news