U Bierlinie zatrymali rasijskaha špijona z Kazachstana
U Bierlinie zatrymali 47‑hadovaha hramadzianina Kazachstana, jakoha ŭłady Hiermanii padazrajuć u špijanažy na karyść rasijskaj raźviedki. Pra heta piša vydańnie Tagesschau sa spasyłkaj na Hienieralnuju prakuraturu Hiermanii.
Zdymak ilustracyjny. Fota: vecteezy.com
Pa materyjałach śledstva, mužčyna z maja 2025 hoda nibyta źbiraŭ u Bierlinie infarmacyju dla rasijskich śpiecsłužbaŭ. Śćviardžajecca, što jon fatahrafavaŭ abjekty, jakija ličyŭ važnymi ŭ vajskovym abo stratehičnym płanie, a paśla pieradavaŭ zdymki svajmu kurataru.
Siarod takich abjektaŭ nazyvajucca dziaržaŭnyja budynki, słužbovy transpart palitykaŭ, abjekty siłavych struktur, vajskovyja kałony na aŭtadarohach, u tym liku technika krain NATA, a taksama pradpryjemstvy abaronnaj pramysłovaści, źviazanyja z raspracoŭkaj bieśpiłotnikaŭ i robatatechniki.
Śledčyja adznačajuć, što bolšaść zdymkaŭ była zroblena ŭ ahulnadastupnych miescach, adnak heta nie vyklučaje kryminalnaj adkaznaści za ahienturnuju dziejnaść.
Asablivuju ŭvahu niamieckich pravaachoŭnikaŭ pryciahnuła infarmacyja, što padazravany nibyta prapanavaŭ stvaryć hrupu i ździejśnić dyviersiju na terytoryi Hiermanii. Pavodle paviedamleńniaŭ, jon zajaviŭ, što «hatovy na ŭsio».
Mužčynu zatrymali 28 krasavika i dastavili da sudździ, jaki pavinien vyrašyć pytańnie ab zaklučeńni pad vartu.
Čytajcie taksama:
Stała viadoma imia piataha abmienienaha špijona, jakoha Polšča addała Rasii
Siarod pieradadzienych Polščaj Biełarusi — taksist z «Paspalitaha rušeńnia» Uładzisłaŭ Nadziejka
Łukašenkaŭskich i rasijskich špijonaŭ na miažy sustrakali z kvietkami VIDEA