«Cisa» ŭ Vienhryi atrymała navat bolš parłamienckich mandataŭ, čym mierkavałasia papiarednie

Nacyjanalnaje vybarčaje biuro Vienhryi apublikavała kančatkovyja vyniki parłamienckich vybaraŭ, jakija adbylisia 12 krasavika. Finalny padlik hałasoŭ śviedčyć, što partyja «Cisa» na čale ź Pieteram Madźjaram atrymała kanstytucyjnuju bolšaść.

Pieter Madźjar. Fota: AP Photo/Denes Erdos

Partyja Madźjara nabrała 70,85% hałasoŭ i atrymaje 141 sa 199 miescaŭ u parłamiencie (raniej kazali pra 139). Partyja pakul dziejnaha premjer-ministra Vienhryi Viktara Orbana «Fides» nabrała 26,13% hałasoŭ i budzie mieć 52 miescy. Šeść pradstaŭnikoŭ u vienhierskim parłamiencie atrymaje ultrapravaja «Naša radzima».

Vyniki vybaraŭ, pakazanyja «Cisaj», źjaŭlajucca absalutnym rekordam pry ciapierašniaj vybarčaj sistemie krainy. Takaja kolkaść mandataŭ daść Madźjaru mahčymaść pamianiać kanstytucyju i chutka demantavać sistemu Orbana. Pryjarytetam dla novaha ŭrada źjaŭlajecca razmarožvańnie finansavańnia Jeŭrasajuza, jakoha patrabuje ekanomika Vienhryi.

Sam Madźjar vyniki vybaraŭ prakamientavaŭ tak: «Biesprecedentnaja bolšaść, biesprecedentnyja paŭnamoctvy i adnačasova adkaznaść».

«Zaraz my razam z usimi kalehami pracujem nad tym, kab u siaredzinie maja partyja «Cisa» zmahła pačać pracu z uradam, jaki štodnia budzie dakazvać, što choć jon i nie idealny, ale byŭ hodny davieru vienhierskaha naroda», — napisaŭ jon na svajoj staroncy ŭ Facebook.

Kamientary da artykuła