U kleckaj paliklinicy pacyjenty pabilisia za miesca ŭ čarzie. Ciapier budzie sud

U kleckaj paliklinicy adbyŭsia kanflikt pamiž dvuma pacyjentami z-za čarhi, jaki pieraros u bojku. Usio adbyłosia ŭdzień, pry inšych ludziach, i było zafiksavana kamierami nazirańnia, piša «Minskaja praŭda».

Fota: Klecki rajonny adździeł Śledčaha kamiteta

Incydent zdaryŭsia 8 krasavika. Mužčyna 1973 hoda naradžeńnia padčas sprečki schapiŭ inšaha pacyjenta (1960 hoda naradžeńnia) za šyju, potym za adzieńnie, šturchnuŭ i pavaliŭ na padłohu. Paciarpieły pry hetym atrymaŭ tolki niaznačnyja drapiny, biez surjoznych traŭmaŭ.

Paźniej mužčyna-ahresar pryznaŭ, što jahonyja dziejańni byli praźmiernymi i što kanfliktu možna było paźbiehnuć.

18 krasavika, adnak, na jaho zaviali kryminalnuju spravu za chulihanstva z užyvańniem hvałtu. Bo taki ŭčynak kvalifikujecca jak nie prosta bytavaja svarka, a parušeńnie hramadskaha paradku.

Ciapier mužčynu moža pahražać pakarańnie — ad hramadskich rabot da abmiežavańnia voli abo aryštu. Kančatkovaje rašeńnie budzie prymać sud z ulikam usich abstavinaŭ, u tym liku taho, što škoda zdaroŭju była niaznačnaj i abvinavačany raskajaŭsia.

Kamientary da artykuła