Sabalenka: Ni rasijanie, ni biełarusy, ni, kaniečnie, ukraincy nie chacieli vajny

«Ale ja maładaja, što ja viedaju pra palityku?»

Aryna Sabalenka na pres-kanfierencyi paśla pieramohi na turniry ŭ Majami ŭ sakaviku 2026 hoda. Fota: Mauricio Paiz/NurPhoto via Getty Images

Pieršaj rakietcy śvietu nahadali pra situacyju na «Rałan Haros»:, kali jaje spytali pra vajnu va Ukrainie: «Zdajecca, heta było niekalki hadoŭ tamu (u 2023 hodzie). Što ty vyniesła z taho dośviedu, kali ciabie prasili vykazacca pra ŭrad svajoj krainy abo pra staŭleńnie da roznych hieapalityčnych pytańniaŭ?

— Ja nie zhodna z tym, jak ludzi tady na mianie nakinulisia. Heta byŭ niaprosty momant. Vidavočna, što nichto nie žadaŭ hetaj vajny — ni rasijanie, ni biełarusy, ni, kaniešnie, ukraincy.

I było tak składana, što ja pavinna była niešta skazać. Mnie treba było vykazać svajo mierkavańnie, ale ž ja nie ekśpiert. Navošta mnie ŭvohule pra heta havaryć? I my bačyli, jak inšyja hulcy ŭsio heta abmiarkoŭvajuć i pakazvajuć na nas, nibyta my majem da hetaha niejkaje dačynieńnie. Momant byŭ vielmi napružany, prosta varjacki. Ja była maładoj — ja i ciapier maładaja, ale kali ŭsio heta adbyłosia čatyry hady tamu, kolki mnie było? 23 hady? Što ja viedaju pra palityku? Čamu vy mianie pra heta pytajecie?

«Ja nie razumieju, čamu ŭsie hetyja žurnalisty zadajuć spartsmienam pytańni na hetuju temu», — adkazała Aryna Sabalenka, piša «Sport Biełarusi».

Padčas turniru «Rałan Haros», što pravodziŭsia ŭ 2023 hodzie, spačatku Sabalenka admaŭlałasia vykazvacca na temu vajny va Ukrainie, paśla čaho jaje pres-kanfierencyi prachodzili ŭ paŭsakretnym režymie ci naohuł nie adbyvalisia.

Adnak paśla 1/4 finału, u jakim jana pieramahła ŭkrainku Elinu Śvitolinu, na pres-kanfierencyi Arynie znoŭ zadali pytańnie pra vajnu ci padtrymlivaje jana Łukašenku.

«Nu, heta składanaje pytańnie. Ja nie padtrymlivaju vajnu, to-bok nie padtrymlivaju Łukašenku jakraz ciapier», — skazała Sabalenka.

Praź miesiac na Uimbłdonie ŭ Łondanie Aryna skazała, što nie budzie bolš havaryć pra palityku.

«Pierš čym my praciahniem, ja chacieła b skazać, što nie źbirajusia havaryć pra palityku. Ja tut tolki dla razmovy pra tenis. Kali łaska, pavažajcie heta», — skazała jana na bryfinhu pierad pačatkam turniru.

Kamientary da artykuła